按盤價 
《小傳日記》當孖屐太過靜局，就要有無風起浪嘅花生料出現嚟炒一下，咁啱今日就有商湯
（０００２０）被沽空機構灰熊出報告話佢業績造假。灰熊話，商湯通過高度可疑嘅收入循環方
式來誇大收入，又話商湯試圖透過裁員來遏止虧損，但係現金消耗反而有增無減。商湯今日最多
跌過近一成，收市跌幅收窄至大約５％。
灰熊據報係來自美國嘅沽空機構，９月嗰時就曾經試過出手狙擊拼多多，話佢旗下主營美國
業務嘅ＴＥＭＵ涉嫌係間諜軟件，令拼多多股價一度急跌，但係如今拼多多已經持續回升，仲
ｋｅｅｐ住創緊兩年幾新高。灰熊官網介紹自己嘅分析師團隊主要來自美國，更加有自己嘅中國
私家偵探團隊，可以直接親身調查相關機構等等。而今次針對商湯嘅報告，更加特別翻譯咗一份
簡體中文版報告。
灰熊對商湯嘅最大指控就係商湯透過收入循環來誇大現金流，報告入面引述咗江蘇省鹽城市
鹽都區人民法院一份判決書，入面就提到商湯對精儀達公司嘅起訴，而精儀達就係灰熊指控嘅「
收入循環」嘅其中一個持份者。灰熊指商湯先將一筆款項轉移至精儀達，精儀達轉移款項至易華
公司，本應易華會用同一款項來向商湯訂立貨物採購協議，但因為易華負責人被提告而無法實現
收入循環，商湯告精儀達。灰熊引述當時法院判決書指出，三方之間已經算係循環貿易，而精儀
達亦已履行協議，所以駁回商湯對精儀達嘅起訴。
灰熊再引述埋內地金融媒體網站資本觀察ＣＥＯ朱江嘅意見，來證明商湯涉及以循環貿易誇
大收入來源，而資本觀察早喺２０２２年已經發布過《九問－商湯科技從隱瞞數據到ＡＩ神話爆
破》，都係質疑商湯數據造假一事。
不過值得留意係，循環貿易如今喺內地法律入面仲未有明文規定禁止，即係仲係灰色地帶。
而灰熊只係引述到今次嘅案件，來推測商湯背後可能仲有更多循環貿易，而當中亦未有更多證據
，所以商湯用循環貿易誇大收入來源一說都只能係莫須有情況。
而今日商湯就回應指報告並無依據，正係審查呢啲指控，並考慮採取適當的行動來保護全體
股東嘅利益，但就無明確澄清報告內容並非事實。如今一切仲有待商湯進一步回應，而家隨便撈
底商湯嘅風險都可謂相當之高，除非商湯可以解釋到循環貿易嘅因由啦，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
WoW WoW星期三：健康網購產品低至$99 (只限今天)► 火速行動
