《小傳日記》2023年魚缸好唔容易咁過完,呢個12月都好唔容易,恒指見完一底又一
底,12月第一日就再見今年新低,最衰嗰陣仲連16000都穿過!好在見過15972之後
就證明16000真係見底,下半個月起大部分時間都一路反彈。
呢個12月外圍就好高興,聯儲局一開始放鴿,美股就忍唔住爆上。恒指一底又一底,道指
就一頂又一頂,睇到魚缸呢邊幾唏噓!食住美股個勢,大隻而又無返來AH股上市嘅中概股拼多
多都受惠唔少,一來少咁重沽壓,二來拼多多第三季收入比起預期多咗成140億人仔,好到震
驚中外孖屐,比起ATM仲喺泥潭中掙扎,資金索性轉吼落拼多多,拼多多連升幾日,市值更加
一度超越巴巴(09988),成為美國上市最大市值中概股。
電商嘅後起之秀普遍都省鏡得多,除咗拼多多,東方甄選(01797)今年嘅成績都穩定
得多,不過今個月就是非一籮籮。事緣東方甄選台柱董宇輝以才子形象聞名,一場直播就掀起董
宇輝粉絲「丈母娘」再次質疑董宇輝嘅待遇唔夠好,發起集體脫粉東方甄選,禍連股價都跌咗一
成有多,偏偏內部下至小編,上至CEO孫東旭,都撲火不力,最後要出動俞敏洪親自接任
CEO,將董宇輝升做「高級合伙人」,而被害視為打壓董宇輝嘅最大力量孫東旭,先係無咗
CEO個位再轉為非執董,最後連非執董都辭任埋,先平息到呢場「關公」災難。
原本以為今個月焦點都係東方甄選,點知到年尾都仲會有「大禮」。做冬當日兼夾聖誕前夕
,魚缸個個都hoilday mood之際,忽然阿爺公布「徵求意見稿」,話唔准遊戲提供
「每日登入」等等嘅誘導性獎勵,要為用戶提供儲值限額,同時遊戲存儲設備一定要儲放喺神州
境內。總知就係一堆孖屐認為極度不利遊戲公司嘅措施,龍頭網易(09999)當日最多試過
暴瀉差唔多三成,幾乎嘔突全年升幅,QQ(00700)全日都唔見一成二。雖然事後官媒放
風話仲有得傾,不過兩隻遊戲龍頭股到今日年結都升唔返出事前嘅價位。
今個12月結果都係大把事發生,好在最終今日都保住17000大關收市,算係為
2023年收個好尾啦,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
WoW WoW星期三:健康網購產品低至$99 (只限今天)► 火速行動