按盤價 
《小傳日記》今年以來神州遊戲業置諸死地而後生，阿爺每月豪批過百隻版號嚟展示對遊戲
業嘅扶持力度加大，所以唔少遊戲股今年都有返生氣，尤其有ＡＩ概念嘅就更加當炒。龍頭ＱＱ
（００７００）最新成績表提到，遊戲業務喺上年第四季明顯到咗樽頸，高基數之下已經難再有
高增長表現，所以ＱＱ方面都急於喺遊戲上搞啲新嘢。
今日就有傳ＱＱ旗下王牌工作室天美同光子都正係招兵買馬，據聞係打算開發一款類似《幻
獸帕魯》嘅養成類遊戲。《幻獸帕魯》係今年１月先開始ｈｉｔ，係由一間日本遊戲工作室開發
嘅開放世界ＰＣ遊戲，感覺係類似薩爾達又或者係動物森友會嘅養成式野外求生遊戲，但特點就
係入面啲幻獸，資深機友一定會發現，所有幻獸都熟口熟面，根本就好似隔籬棚堆
Ｐｏｋｅｍｏｎ咁樣，每隻幻獸都總會發現到一隻同佢撞樣嘅Ｐｏｋｅｍｏｎ。
雖然撞口撞面，不過都無阻《幻獸帕魯》嘅爆紅之路，因為比起Ｐｏｋｅｍｏｎ只可以用精
靈球捉完再訓練出去對戰，《幻獸帕魯》入面更加似人類世界對待動物，捕獵幻獸之後可以訓練
佢幫自己做嘢，更加可以劏咗佢嚟食！呢一點都好震驚玩家，甚至惹嚟保護兒童組織抨擊，亦都
有素食組織要求《帕魯》推出「素食指南」。
據天美同光子嘅招聘啟事提到，今次請人係想開發一款「將開放世界、生存和製作元素與虛
擬寵物的培育結合在一起」同時係「擁有可愛寵物的奇幻冒險世界」嘅遊戲，暗示咗係對標《幻
獸帕魯》。
如果ＱＱ真係想對撼《幻獸帕魯》，但係又要一樣「擁有可愛寵物」元素，唔知又會唔會將
可以劏嚟食嘅元素放落去呢？畢竟呢個都係《幻獸帕魯》嘅大熱元素，但係神州對於保護未成年
人政策咁全面，照計又好難批到可以殺寵物嘅遊戲，ＱＱ要照辦煮碗兼跑出真係唔易，或者真係
要煮個「素食版」都唔定，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
全新節目《說說心理話》青少年不可以戀愛！？真實個案講述驚心動魄經歷► 即睇
