RSS訂閱 《笑傲缸湖》花旗國上一次踏足月球，已經係登月任務「阿波羅１１號」嘅事，直到依家相
隔半個世紀了。花旗國一早就放棄咗用穿梭機載人上太空，但「鋼鐵人」馬斯克對發展太空表現
出雄心壯志，旗下嘅ＳｐａｃｅＸ火箭Ｓｔａｒｓｈｉｐ打算喺２０２１年飛上月球。
「聽起嚟好瘋狂，但我諗我哋可以喺兩年內再次登陸月球！」馬斯克最新接受媒體訪問時真
係咁講。但係佢都保守估計，人類坐Ｓｔａｒｓｈｉｐ往返月球，應該要等到２０２３年，啱啱
好比美國太空總署（ＮＡＳＡ）希望派一個女太空人上月球嘅２０２４年早一年。
雖然ＮＡＳＡ署長之前話，ＮＡＳＡ會考慮用ＳｐａｃｅＸ呢類嘅火箭往返月球，但後嚟又
反口話新登月計劃肯定會用返ＮＡＳＡ自家嘢。
訪問中，馬斯克的確表現到有啲不滿㗎，佢話「與其花時間說服ＮＡＳＡ，倒不如我直接射
上月球畀佢哋睇，比說服ＮＡＳＡ仲容易啲添，而往返月球最快嘅方式可能就係單打獨鬥。」
聽就聽得多馬斯克嘅理想，但實際情況又係點呢？單引擎Ｓｔａｒｓｈｉｐ原型喺上星期二
（９號）嘅測試中發生意外，仲出現咗一個大火球添。雖然火箭原型似乎無乜受到嚴重破壞，但
本來上個星期Ｓｔａｒｓｈｉｐ首次升空嘅目標又推遲咗啦！不過，ＳｐａｃｅＸ火箭出事都唔
係第一次㗎啦，今年試射ＳｐａｃｅＸ Ｃｒｅｗ Ｄｒａｇｏｎ期間都出事。
其實ＮＡＳＡ自己本身都一身蟻，署長星期三（１７日）直接同參議院委員會講，２０２４
年個新登月計劃仍未有成本估算，仲有個太空發射系統，做咗８年都仲未做好。
雖然侵侵（特朗普）已經命令成立美軍太空司令部，好似好積極發展太空，但私人機構點樣
參與計劃，可能等Ｓｔａｒｓｈｉｐ喺２０２１年上到月球先再購啦！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
