RSS訂閱 《笑傲缸湖》缸友們一年都返兩三次鄉下，咪就係東瀛國（日本），唔知係咪個個都想去個
邊養老？但其實當地人口老年化問題已經好嚴重下，再迫過去都未必好事。有幾嚴重？日本總務
省啱啱公布人口調查報告，截至今年１月１日，東瀛人口蒸發咗４３萬人，跌幅創下５１年新高
，而且仲要係十連跌啊陰公。
呢個問題已經嚴重影響到當地勞工供給問題，所以當地已經擴大開放外藉勞工，希望可以填
補返請唔到人嘅問題，所以成龍大哥就唔使再好似電影「新宿事件」入面所扮演嘅男主角咁偷渡
去新宿做黑工，終於可以光明正大咁去打工囉。
按照日本厚生勞動省推算，東瀛人口係２０１７年嘅１﹒２６億人，去到２０４０年就會減
少至１﹒１億人，其中６０歲仲做緊野嘅就高達１３１９萬人，以勞動人口計，每４個勞動人口
就有１個就係６０歲以上，預計去到２０３０年當地缺乏勞工人口數目就高達千萬人。
人口老化除咗帶來勞工問題之外，原來社會問題都幾嚴重。話說今年５月底一個「隱蔽中年
」係川崎市進行無差別行兇，殺咗個小朋友之後再自殺。之後有一位７６歲退休高官都擔心自己
４４歲嘅親生仔都會做出同樣事情，所以就手刃親兒再自行報案，令到社會對「隱青」、「隱中
」特別關注。
其實２０幾年前日本已經出現「隱青」呢個詞語，佢地可能喺學校被人欺負之後，對人生或
者社會不再感興趣，又或者部分人係９０年代遇上經濟泡沫，搵唔到工嘅情況下，終日係屋企係
無所事事，全靠父母供養，並且失去自理能力；當父母突然係屋企發生意外身亡之後，呢班仔女
會伴屍父母隔離雙雙離世。
據了解，「８０５０」家庭已經成為東瀛社會嘅嚴重問題，其實係講緊一啲八十歲父母依然
供養緊自己五十歲嘅仔女。當年呢班「隱青」慢慢變成「隱中」，就算好多ＮＧＯ都開埋
Ｃｏｕｎｔｅｒ畀佢地求助，但Ｃａｓｅ依然有限，因為班社工真係唔知點入手搵佢地出嚟，唯
有等佢地自己尋求幫忙。
計盈盈話齋，天無絕人之路，連香江著名隱青「阿源」到今時今日都可以成家立室，有一份
正當職業養妻活兒，我覺得應該要邀請阿源去東瀛演講下，因為「這些機會」依然屬於大家的！
《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
