RSS訂閱 花旗國總統侵侵（特朗普）向來語出驚人，近排佢就投訴屋企浴室嘅花灑頭出水太慢，影響佢塑造完美嘅髮型。最近，相關部門就提出建議，話要修訂出水嘅標準，但就遭到環保團體反對。
目前聯邦政府規定，花灑嘅總出水量唔能夠超過每分鐘２﹒５加侖（約９﹒５升），即係話就算用緊嘅花灑有幾多個獨立出水口，都唔可以超出呢個總出水上限。不過喺９０年代時，呢條法例只係規定花灑嘅出水量每分鐘唔可以多過９﹒５升，而前一任總統奧巴馬就作出進一步修訂，規限多個出水口嘅總出水量上限都以呢一個為標準。
可能就係因為咁，侵侵覺得花灑嘅出水速度唔夠快唔夠多，搞到佢沖涼嘅時候都等多一陣，咁樣亦影響佢打造完美髮型。所以，花旗國能源部最新建議，取消上屆奧巴馬政府嘅修訂，容許每個出水口每分鐘出口量以９﹒５升為上限。
但呢個提議亦都引起環保團體嘅批評，有組織負責人表示，如果花灑頭有４至５個或以上出口，姐係話每分鐘就可以噴出合共３８至５６升嘅水，咁噴出來嘅水多到可以將人衝出浴室。佢地仲「好心」咁建議侵侵，如果想買花灑頭，可以有其他更好嘅推薦，更何況依家國家面對住咁多問題，相信花灑頭並唔係其中一個咁有迫切性嘅問題。
盈盈唔太清楚點樣改善花灑頭嘅出水量，可以具體地幫到侵侵佢保持完美嘅髮型，但相信奧巴馬政府當年嘅修訂都係由環保嘅角度出發嘅。睇返香江呢邊，政府都建議沖涼嘅時候使用節水嘅工具，例如高用水效益嘅花灑頭，比起傳統花灑頭每分鐘大約１５至２５公升，可進一步減少至每分鐘耗水９公升。希望花旗國日後真係通過左呢條新規之後，花旗國人都唔好沖涼沖咁耐，因為地球水資源好寶貴架！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
