RSS訂閱 踏入２０２０年說明離５Ｇ時代又近一步，近日一班５Ｇ佬又畀炒起，加上唔少外國國家都話或者會考慮用華為嘅５Ｇ設備，缸友似乎都好睇好５Ｇ佬前景。好似京信通信（０２３４２）咁，一連兩日個股價好似坐火箭咁飆升成兩成幾，不過博客喺到就唔建議各位高追了，不妨可以留意落後嘅魚毛神州鐵塔（００７８８）。
講起就怪了，近排隻隻５Ｇ佬唔大升都郁幾格，但係隻鐵塔嘅股價真係如同佢個名一樣，硬正到好似推極都唔郁。或者係因為佢由２﹒２銀高位開始就不斷拾級而下，令缸友都對佢無晒信心。不過，近日再次見到成交略有增加，或係全年業績公布後有機會追落後。
消息面方面，日前喺神州廣東省兩會上就話，喺２０２０年內將會新建近５萬個５Ｇ嘅基站。至啟動５Ｇ商用開始，廣東省累計建成、開通３萬個基站，而全個神州都係開左１３萬個基站。喺側面反映，要實現全面覆蓋５Ｇ網絡，喺全國範圍內仲要起多十幾萬個基站，甚至幾十萬個基站，咁鐵塔嘅生意長時間嚟係可觀的，亦相信去年全年業績唔會差得去邊。
因為鐵塔正處於發展階段，上年上半年嘅ＥＢＩＴＤＡ率已上升至７３﹒２％。且佢主要營收來源係租賃收入，站址資源共享率改善對佢盈利能力有好大的提升。加上，佢仲有國策嘅支持，目前９７巴仙嘅市佔率可謂係壟斷市場。
從公仔圖睇，雖然走勢不及其他５Ｇ佬咁凌厲，但佢近日都有上升，仲分別破十天線、廿天線及百天線，相信佢短期嘅走勢已有轉好嘅跡象。且最近佢仲向上試上２５０天線（約１﹒８４２），若能突破並企穩２５０天，料短期上望２銀不難。若想吸納５Ｇ佬，不妨可以喺現價部署一下鐵塔。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
