《小傳日記》好特賣超市平價直逼深圳，高鋪租喺香港撐得幾耐？

　　《小傳日記》噚日（２８號）內地平價超市「好特賣ＨｏｔＭａｘｘ」葵芳滙分店開張，人
氣爆燈，吸引咗唔少市民去幫襯，搞到店內逼滿咗顧客。「好特賣ＨｏｔＭａｘｘ」攻港不足一
個月，已經開到第三間分店，仲要喺消費低迷嘅時候，真係犀利！近年嚟，港人北上消費風潮興
起，一到節日前後，口岸就排晒長龍。本港零售銷貨表現截至今年８月已連跌咗六個月。
　　咁呢間好特賣ＨｏｔＭａｘｘ究竟係咩來路，如何係零售業低迷時一枝獨秀？好特賣
ＨｏｔＭａｘｘ係賣臨過期食品，走薄利多銷嘅路線，啲產品有零食、飲品、酒類、即食麵、衛
生用品、清潔用品同護膚品等等。最吸引人嘅係佢啲價格，直逼內地！例如２銀一支可樂，
２﹒５銀一包薯片，５銀一支津路烏龍茶，網友驚歎，冇辦法想象！係香港竟然可以用咁低嘅價
格買到其他超市同樣的產品。最正嘅係，香港同內地價格差唔多，以後周末可以唔使北上消費，
慳返啲時間同車費。
　　翻查資料，好特賣隸屬於上海芯果科技有限公司，成立於２０２０年２月，專注提供「超低
折扣」商品，產品主打臨期食品同日用品。到２０２３年，好特賣喺中國已經有超過５００家分
店，遍布北京、上海、廣州、深圳、武漢、南京等３２個城市。
　　不過，唔係個個香港人都咁鐘意好特賣，有人就質疑啲食物同貨品嘅質素同成分。有啲人擔
心：「平嘢冇好嘢」，擔心質素會唔會有問題。
　　對於呢間新店，亦有唔少人唔睇好佢嘅長遠發展。有啲人擔心，香港啲租咁貴，價格仲做到
同內地差唔多，會唔會捱唔住呢？有人話，呢個舖租唔平，之前間藥房做咗５年都要蝕走。
　　不過，係咪買都係見仁見智，畢竟有人覺得抵買，有人就係擔心質素問題。講真，呢啲平價
超市喺香港嘅發展，仲有待觀察。最終會唔會成功，就睇佢哋點樣應對香港市場高鋪租同高質素
要求嘅挑戰喇。至於我，就諗住搵日去睇吓啲人龍係咪真係咁誇，順便睇吓有冇啲好嘢賣！請請
！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。