《小傳日記》電視廣播首季廣告收入升，上半年有望轉賺，全年呢？

　　《小傳日記》經歷上周五（１９日）以色列與伊朗關係轉趨緊張帶來的震盪後，恒指今日顯
著反彈。升市之中見到一個稀客－－電視廣播（００５１１），今日股價最高升逾一成，收市升
逾６％。原來集團今日公布今年首季營運資料，本地廣告收入上升，比舊年同期有雙位數百分比
增長，部分歸因於集團維持舊年第四季單價水平。
　　集團公布，部分已經一段時間無投放廣告嘅藍籌客戶，已經重新投放廣告。集團預計呢種趨
勢會持續，加上潛在嘅新客戶，將有助於集團全年廣告收入較２０２３年有所增長。預期集團今
年上半年將會錄得淨利潤，並在２０２４年全年有機會實現正數ＥＢＩＴＤＡ。
　　集團管理層咁有信心，自然可喜可賀。又係嘅，集團過去五年一直都蝕緊錢，最近呢兩年
（２０２２年同２０２３年）講緊一年蝕７、８億銀。一間市值大約１３億嘅公司，一年蝕７、
８億，都咪話唔揦脷。而家止蝕在望，梗係好事啦！不過係唔係代表股價已經見底？呢個問題怕
且唔係咁簡單。
　　首先，今時今日電視娛樂早已不復當年興旺，來自各種社交平台，每日接收嘅信息多到睇唔
曬。仲有幾多人會追電視節目？後生仔女就算追電視劇，除咗本地劇，網上仲有其他地方，例如
內地，美日韓台，甚至泰國等地嘅電視劇競爭。年紀大又社交生活不活躍嘅粉絲或者會堅持留守
，但呢批「熟粉」又唔係社會主力消費群，對於廣告商來講，佢地嘅潛在價值有幾大？
　　除咗海外競爭，生活模式同消費模式嘅改變，亦係主因。以前的產品要接觸消費者，最簡單
直接嘅途徑，就係電視廣告。但今時今日，社交媒體，網紅帶貨直播無孔不入，甚至網購平台本
身就是最好的廣告平台。以前，超市除了在電視廣告有長期廣告，仲會有每周特價產品廣告。但
喺呢個網購年代，消費者直接登入超市選購，所有價格一目了然。難怪而家超市廣告已經愈來愈
少，未來電視廣告嘅整體趨勢恐怕大同小異。
　　就算今年首季廣告因為之前基數低有所回升，但升勢可以維持幾耐？集團就算今年上半年真
係轉為淨利潤，具體淨利潤金額有幾多？相信好多投資者都會有疑問。要留意一下，講緊嘅淨利
潤係上半年。而全年呢？係正數ＥＢＩＴＤＡ，無人講全年淨利潤，所以大家睇嘢要金睛火眼先
得。
　　其實而家ＡＩ大行其道，做直播都可以揾ＡＩ搞掂，未來嘅電視台大可以考慮下揾ＡＩ做主
角。要幾靚有幾靚，聽教又聽話，包保唔會跳巢，電視台仲可以節省唔少開支。或者到嗰時，電
視台有望實現全年淨利潤，而唔係正數ＥＢＩＴＤＡ咁簡單呢。請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。