《小傳日記》跌完一排，魚缸唔覺意又升咗成６００幾點，多得阿爺肯跟進繼續開水喉，口
風方面有商務部話要擴大消費，實際操作上有「錢袋子」中央匯金慷慨解囊，擴大對Ａ股ＥＴＦ
嘅增持範圍，手口並用嘅結果就係深證成指暴升６％，上證綜指都飆３％，魚缸都齊歡暢大升
６００幾點，不過暫時就未過上個月底高位１６２５８，如果升穿埋就後市睇好啲嘅。
今日除咗阿爺繼續開水喉之外，今朝傳出嘅佐丹奴（００７０９）變天新聞都好有花生味。
事緣佐丹奴嘅大股東周大福就動議罷免現任主席兼ＣＥＯ劉國權，改請前Ａｄｉｄａｓ亞太及大
中華區總經理Ｃｏｌｉｎ Ｃｕｒｒｉｅ作為新任ＣＥＯ，更加推薦新世界（０００１７）鄭氏
家人鄭志雯同鄭志亮入局，將會召開ＥＧＭ表決。
劉國權可以話係佐丹奴嘅重量級老臣子，１９８７年加入佐丹奴，１９９４年開始做ＣＥＯ
，到今年可以話已經做足３０年，要用到罷免下台呢一招都幾難睇。不過就算唔睇業績都知，過
去呢十年來佐丹奴的確係今非昔比，由以前係本地時裝嘅龍頭，Ｂｏｓｓｉｎｉ同Ｂａｌｅｎｏ
都係排後面，到而家聲勢真係大不如前，啱啱出條盈喜，預計上年最多都係賺多三成，已經算係
跑輸大市，亦難怪鄭家終於要下定決心改革。
過去一年係疫後復甦嘅一年，基數低咗按年都只係賺多三成，已經係唔合格。不進則退，近
期港人都興返大陸使錢，再唔搞搞佢，恐怕真係會被市場淘汰，今次搵嚟前Ａｄｉｄａｓ亞太區
總經理接手，其實都算係好合理。奇就奇在劉國權都年屆７０，而家自己退落嚟都係合情合理，
但要咁樣走都係自己無面。希望佐丹奴呢場人事變革真係有利佢重新上路啦，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
《說說心理話》情緒勒索任何關係均有機會發生 如何走出情緒勒索循環？► 即睇
