《小傳日記》快餐店輪流放榜，大家樂贏在廣告銳不可當？

　　《小傳日記》１１月就快過，連美團（０３６９０）都「寶物」沉歸底出埋業績，連隨恒指
都沉歸底鑿穿１７０００，第三季業績期都即將告一段落，本地兩大龍頭快餐股大家樂
（００３４１）同大快活（０００５２）都先後出咗截至９月嘅中期業績。
　　其中大家樂就係噚日晏晝出，大快活就係今日晏晝，不過大快活放榜之後馬上急插一成一，
皆因中期按年少賺一成半得返回３６３１萬銀，雖然照派１１仙息，不過都撐唔住股價。睇返大
家樂就高興得多，按年賺多八成四，仲加派五成中期息，每股派１５仙。大家樂仲話，如果唔計
政府疫情資助，純利按年係勁升三倍。
　　話就話大家樂勁賺，都係受惠低基數效應，但如果一樣係基數低，咁大家樂真係跑贏大快活
好多。回顧過去呢六個月時間，大家樂宣傳攻勢明顯強得多，一來有做電視廣告，首廣告歌日播
夜播，隨時都感覺又上演，仲要一坐入餐廳就可以聽得到。另外，大家樂仲有會員制，儲夠分又
可以換嘢，反而大快活雖然都有會員制，但係就無儲分計劃。大家樂業績入面提到，截至９月嘅
六個月入面，推廣支出就用咗超過５１４０萬銀，證明廣告錢係使得其所，相對大快活就無一欄
標明廣告開支。
　　另外，大家樂同大快活都有經營除咗自己牌頭嘅餐廳，但相對之下大家樂就多好多非「大家
樂」嘅餐廳。除咗４７間一粥麵都歸類為「速食餐飲業務」之外，大家樂旗下仲有上海姥姥、米
線陣、意粉屋同Ｏｌｉｖｅｒ＇ｓ　Ｓｕｐｅｒ　Ｓａｎｄｗｉｃｈｅｓ合共１２９間門市，相
對大快活只有合共１０間分別係一碗肉燥、ＡＳＡＰ同一葉小廚，大家樂系明顯人才濟濟得多。
　　大快活同大家樂明顯係用緊唔同嘅推廣策略，大快活提到新餐「食得夠ＧＹＭ」雞胸套餐係
「有賴於有效而低成本的線上廣告以及知名ＫＯＬ的推介」，證明大快活係真係有意換過一個推
廣模式，減低依賴線下宣傳，但係喺疫後復甦呢一段時間明顯被大家樂比下去。睇來大快活對於
轉型線上推廣方面仲要掙扎一段時間，公司同孖屐都仲需時適應，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。