《小傳日記》涉嫌合謀定價！競委會告美聯，放中原？

　　《小傳日記》今日晏晝美聯（０１２００）停牌，無幾耐就輪到競委會開記者會，話要告美
聯同旗下港置，涉嫌聯同中原同旗下利嘉閣合謀制定佣金比率！
　　事緣上年底上述四大地產中介不約而同出咗張內部ｍｅｍｏ，話由今年起要確保每宗交易嘅
代理實收佣金比率必須係一手物業交易嘅最少２％，如果唔係就要得到董事批准。因為字眼相似
，當時已經引起咗競委會注意，仲提出埋有可能違反《競爭條例》，隨後地產代理監管局曾經提
醒中介小心踩界，但經過競委會接近一年嘅調查，終於正式入禀控告相關人士。
　　競委會就話，上年１０月至１２月，中原集團同美聯集團嘅高層曾經６次就一手物業交易作
討論，最終就制定出「實收佣金不少於２％」嘅方針，並喺四大行落地，限制前線代理為爭客而
向買家提供回佣嘅比率。競委會話涉及回佣就會影響買家最終實際嘅支付金額，相信有關做法係
構成合謀定價。
　　不過最終今次競委會入禀控告嘅五名人士都係美聯集團嘅高層，反而中原高層就未有喺名單
之內。原來競委會有條《為從事合課行為之業務實體而設的寬待政策》，係向從事或牽涉入合謀
行為嘅業務實體提供強烈、透明和可預計嘅誘因，令其停止有關行為及向競委會作出舉報。競委
會就喺調查期間，中原「好快合作」，過程中亦提供咗好多資料同協助，所以就批咗中原嘅寬待
申請，結果中原就獲得全員甩身嘅「寬待」。
　　競委會今年以來已經係第二次高調出手，上次就係ＫｅｅＴａ　６月攻港之後，競委會出招
指控ｆｏｏｄｐａｎｄａ同Ｄｅｌｉｖｅｒｏｏ合謀定價，最終兩間一齊認衰，都未有用到《寬
待政策》。今次中原就「活用」咗《寬待政策》而甩身，但相信競委會調查嗰陣一定向兩大集團
查詢，相信美聯絕對唔會唔知有《寬待政策》，好有可能只係慢過中原一步申請寬待。而《寬待
政策》同污點證人概念相似，但係污點證人仍然有機會被控告，而《寬待政策》疑似係可以完全
甩身，咁唔通即係鬥快手申請寬待就得？請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。