《小傳日記》講咗咁耐終於出爐施政報告，樓市減辣措施如期出現，買家印花稅同新住宅印
花稅減半，由１５％減至７﹒５％；而額外印花稅嘅適用年期亦都由三年縮短至兩年，即係新買
樓持貨兩年就唔使再畀額外印花稅。另外，房委會將放寬資助出售單位按揭貸款保證的安排，延
長二手市場最長３０年按揭貸款保證期至５０年，一於同層樓鬥長命。
而港府亦都終於跟隨阿爺嘅步伐，宣布下調股票交易印花稅，由現時買賣雙方各按交易金額
支付０﹒１３％，合共０﹒２６％，降至雙方各畀０﹒１％，合共０﹒２％。雖然叫做減咗，不
過股票印花稅喺２０２１年先由０﹒１％加到０﹒１３％，而家極其量都只係還原，比起阿爺大
手筆減半，呢邊真係顯得孤寒。
雖然施政報告係由１１點先開始讀，不過大家一路都捕住佢幾時講減股票印花稅，點知頭一
個鐘都未讀到，但係一等到１２點放ｌｕｎｃｈ，仲要等到１２點０５分價定之後嘅１２點０８
分，先正式讀到去減收股票印花稅，啱啱好趁個市郁唔到先讀到，呢個計算真係精密到不得了。
不過「是升不是跌，是跌就要跌」，比起阿爺嘅鬆手力度，買賣雙方減０﹒０６％嘅股票印
花稅真係差得好遠，所以，生發發（００３８８）午市升過一浸之後就要繼續跌，收市最後要跌
足４％，連２８０銀都企唔穩，再試下半年以來強力支持位２７８銀。以今日走勢來睇，生發發
高開低走，最終以超巨大陰燭做利淡穿頭破腳，成交量更加創接近一年新高，單以技術分析來講
恐怕係有排跌，初步下方支持要睇到舊年底嘅反彈支持位２６０銀，有貨而家真係要小心，請請
！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】內地旅客赴港澳購物免稅額提高，你認為能否幫助促進本港旅遊消費？► 立即投票
