《小傳日記》香港近期就興去麥記飲杯新咖啡，而神州就興飲白酒溝咖啡，就係由茅台同瑞
幸聯名一齊推出嘅「醬香拿鐵」。
茅台身為國酒，深受國民喜愛，溝落乜嘢度都會大熱，好似之前就試過出「茅台雪糕」，當
然都係火爆大熱。今次醬酒溝咖啡，仲要由兩大名牌聯手，單睇牌頭都夠曬吸睛。醬香拿鐵今個
星期一（４號）喺瑞幸門市開賣，盛惠３８銀人仔一杯，開頭人人用優惠券就可以半價試飲。結
果新出第一日，就大賣超過５４２萬杯，銷售額過億人仔，打破瑞幸嘅單品紀錄，實在係可喜可
賀。
不過大賺同時，都不忘要剷除潛在對手。江陰市市監局噚日（５日）就對市內３間ｃａｆｅ
處以罰款，３間分別被罰約１４萬人仔、９４００人仔同３５００人仔，話佢哋未經授權就將茅
台、五糧液、國窖、響、山崎同獺祭等等名酒溝咖啡來出售，仲喺鋪頭內銷售貼有相應品牌商標
標簽的咖啡產品，話佢哋侵犯註冊商標專用權。除咗罰錢之外，仲要沒收「違法所得」，扣除相
應成本之後，每杯利潤１０蚊人仔，３間分別銷售１６１７杯、１１２杯同４２杯。
根據天眼查Ａｐｐ顯示，３間ｃａｆｅ最早就喺２０２２年４月１號就開始賣有酒咖啡，即
係早過瑞幸差唔多成年半，不過瑞幸攞正牌同茅台合作，當然可以高舉「名門正派」嘅牌頭。不
過人哋都早成一年開始賣，最多嗰間都係賣咗１６００幾杯，賺埋都係皮幾嘢，好明顯都係名不
經傳嘅小店。雖然用法例來講就點都係瑞幸攞正牌係啱，不過新品大賣咁威嘅同時腳下踩住被大
石砸死蟹嘅小店，醬香幾香都好難睇唔到腳下嘅血淋淋。
其實酒咖啡都唔係咩新鮮事，好多ｃａｆｅ都會有得賣愛爾蘭咖啡，就係ｅｓｐｒｅｓｓｏ
加上愛爾蘭威士忌而成，熱飲一杯又有淡淡酒香，係冬天暖胃佳品。如果幾間細ｃａｆｅ最初只
係賣「白酒咖啡」而唔標明係茅台，唔知又會唔會被人「遲來先告」？請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
WoW WoW星期三：精選保健品低至半價！ (只限今天)► 火速行動
