《小傳日記》啱啱ＴＶＢ（００５１１）香港小姐先出爐，好似平平淡淡就過咗一屆，無乜
宣傳之下就選完。以為無乜好講，點知選完先精彩，有網媒連續幾日報道有關出爐冠軍莊子璇同
亞軍王怡然花邊，除咗莊子璇被報道係同「福建幫」，自己更加係「香港錦埔同鄉聯誼會」嘅監
事之外，王怡然都被揭發阿爸原來係神州疑似已經執笠嘅漢普森教育嘅創辦人。
當王怡然當選港姐亞軍之後，就引起大批被拖糧同拖人工嘅員工同家長聲討。有來自天津嘅
家長就發文，話交咗１９０００人仔以上嘅補習費，到２０２１年８月漢普森「跑路」，去過教
育部門、派出所等等登記過都無消息，申請退錢又無回應，而且被告知財產已經轉移，法律途徑
都追唔返錢。
又有疑似前員工發文話，可以理解前兩年因為疫情而要關閉，不過既然全家可以喺香港過得
咁風光，個女仲做埋港姐亞軍，就應該諗吓辦法還錢畀家長同員工。其後王怡然阿爸王召軍終於
上水回應，題為《我是王召軍，漢普森教育的創始人，這是一封遲來的道歉信》，話抱歉而家先
發聲，話呢段時間並唔係外界所講嘅「著草」，而係一直設法解決問題，話「銷聲匿跡」呢段時
間，先用咗一啲時間來「自我修復」，之後就同幾位舊同事一齊研發線上ａｐｐ，希望可以為未
上完堂嘅同學繼續上堂。
數返２０２１年８月正就係「教育雙減」震撼出台嘅時候，當時隻隻教育股都仆直，相信漢
普森都係嗰時冚竇。而家「雙減」時隔咁耐，連新東方（９９０１）都華麗轉身靠東方甄選
（０１７９７）轉搞直播。而家王老闆先至話再搞，於是有網民就話，唔係個女做咗港姐都等唔
到佢回應，整體都唔算收貨。
教育股入面如今除咗新東方系轉跑道發到圍，其他教育股都係一池死水，究竟阿王老闆成唔
成功翻身真係難講，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
《說說心理話》情緒勒索任何關係均有機會發生 如何走出情緒勒索循環？► 即睇
