《小傳日記》敘福樓集團（０１９７８）尋日公布截至６月３０日止中期業績，期間盈利
４７６０萬元，比舊年同期大增６倍，當然係因為低基數啦，每股盈利５﹒９４仙，派中期股息
４﹒７５仙，再加派特別股息每股１２﹒５仙，總共１７﹒２５仙。
心水清嘅會發現，以發行股數８億股計，即係要派１﹒３８億銀出街，但係佢嘅盈利唔夠
５０００萬，點派？根據年報，控股公司「叙福樓控股」（ＬＨＧ Ｈｏｌｄｉｎｇｓ）持有敘
福樓集團７５％股份，而主席兼行政總裁黃傑龍就係以「叙福樓控股」間接持有上巿公司７５％
股權嘅大股東之一，所以實際派出街係３４５０萬銀，派完仲有剩。就算控股公司嘅股東要
ｄｒａｗ水，集團有短期銀行存款２億幾銀，同埋現金同現金等價物億幾銀，總額３﹒６億銀，
夠應付有餘。
當然，投資者只係關注敘福樓現價買唔買得過啦。如果以現價１﹒２４銀計，總共收
１７﹒２５仙，即係息率有成１４厘，絕對係高息之選。敘福樓喺２０１８年５月３０日上市，
當日嘅高位１﹒９７７銀仍然係上市以來最高，２０２０年３月１９日跌到０﹒３２銀嘅上市新
低，反彈跌幅５０％，即係１﹒１４８５銀，２０２１年４月１６日最高升到１﹒３８銀，之後
又跌番，舊年３月１６日低見０﹒７３銀，１﹒０５至１﹒１０銀差唔多係過去兩年嘅橫行區頂
，以現價１﹒２４銀計，除淨後股價係１﹒０６７５銀，即係返番去前橫行區頂高少少位置。
不過，經營成本明顯上升，物業租金及相關開支達到３９５５萬銀，比舊年同期大增近
６９％。投資者要考慮嘅係，過去幾年有政府派發消費劵，加上對企業進行補貼，以後仲有冇未
知，食客係咪仲係咁多，未來係咪仲有咁高息派？依家特區政府又話要搞活個夜市，會唔會頂爛
市㗎？１４厘息確係吸引，但依家面對高息環境，飲食業唔易做，敘福樓６﹒６億銀收入，但食
材同員工開支都超過４億銀，１﹒０６７５銀係咪強支持？打個折，若到一蚊先諗啦！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
夏日中暑高風險！即睇中暑迷思＋預防措施！► 立即了解
