《小傳日記》上回就講到東方甄選（０１７９７）因為有播主「唔小心」喺抖音直播嗰陣，
ｓｈｏｗ到個ｃｏｄｅ，被抖音評定為故意引流而罰停播３日。被罰後東方甄選把心一橫，直接
喺自家ａｐｐ做８５折大減價，上個禮拜五就公布成功締造３０００萬人仔嘅單日銷售額。
原定就罰停播到去７月２９號，不過到今日為止，東方甄選都未正式喺抖音復播。對於被罰
停播，ＣＥＯ孫東旭之前就答，係佢哋自己觸犯規則，會積極整改，而且「過去、現在和未來，
都會和平台好好合作發展，我們跟平台一直溝通順暢」。不過呢句之後，就一直都未有復播嘅下
文。
不過就喺噚日，東方甄選公布，７月２９號單日銷售額更加去到３５００萬銀，４日促銷夾
埋有成１﹒１億銀人仔銷售額。所以，東方甄選就索性將促銷延長到今日先完。不過就一直無講
幾時會正式復播。
都好難怪東方甄選會寧願繼續停播，反正自己做緊減價反應咁好，呢個時候返抖音開播反而
係自己搶自已生意，到時分流咗自營ａｐｐ嘅流量就仲弊。加上正係月尾，索性繼續自營ａｐｐ
優先，谷高條數一來可以做靚７月盤數，二來就係可以測試自營ａｐｐ嘅最大潛力。
開得自營ａｐｐ，最大目標當然就係唔想寄人籬下，既然有個咁好嘅機會，點解唔試吓？東
方甄選播咗咁耐，無理由唔知唔可以ｓｈｏｗ到ｃｏｄｅ，當然都無證據證明佢係故意「唔小心
」，不過真係一個難得嘅好機會，梗係要試盡先。做靚自營ａｐｐ流量，第時要傾廣告都好傾啲
，睇來東方甄選要脫離抖音都唔係完全無可能，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】有議員倡向來港高才專才派2萬元生育獎金，你認唔認同？► 立即投票
