《小傳日記》油價噚晚（２日）再一次跌穿３０蚊美金，道指嚇到急插近３００點收市報
１６１５３，標普、納指又齊齊唔見約２巴仙。老老實實，油組一日未傾得掂減產，油價都唔使
旨意有起色，魚缸被油價牽住鼻子都好難走得甩大上大落嘅命運。
美股急插，港匯突然之間轉弱，噚晚又試過跌穿７﹒８水平，走資陰霾重現。連一向都行穩
陣路線嘅友邦（０１２９９），都受累銀聯境外投保設限，開市前競價驚現逾９巴仙跌幅，種種
不利消息突襲下，恆指今朝（３日）裂口低開５３５點報１８９１０，最多試過唔見６８２點。
不過Ａ場尾市有番Ｄ力，只係微跌０﹒４巴仙收２７３９，香江總算可以定一定神。不過，恆指
埋單仍然要瞓低４５５點收１８９９１，跌穿十天線（約１９１７９）；國指碌低２００點收
７８５８。全日成交多番１３巴仙至近７８７億銀。
＊油價穿三十美股插三百，裂口大低開好倉即被殺＊
為咗防走資，銀聯設定境外投保嘅每單碌卡金額最多只可以５０００美金，今朝一開市重磅
股友邦（０１２９９）即刻急插，試過唔見超過９巴仙，低見３７﹒１銀創年半低。好彩，有大
行幫手派定心丸，瑞信話可以用銀聯以外信用卡找數，德銀就指雖然限每單交易金額但無限到次
數，對分期供保險嘅影響有限，對友邦嘅影響亦可受控。有大行穩定軍心下，結果友邦埋單跌少
好多，但仍唔見近半成，收報３８﹒９５銀。
其他保險佬亦唔多掂，宏利（００９４５）亦碌低半成，收報１０１﹒２銀；連保誠
（０２３７８）都唔見逾４巴仙，收報１４３﹒３銀。跌得最甘嘅係喺香江提供保險經紀業務嘅
嘅民眾（００２７９），急插２９巴仙，係今日表現最渣個股。
至於一眾內險，就繼續尋底之旅；壽仔（０２６２８）、平安（０２３１８）、財仔
（０２３２８）都再創低位，壽仔仲跌４大巴仙。
＊銀聯突設限保險叫救命，友邦瀉一成內險續尋底＊
穆迪續將渣打（０２８８８）列入下調複評名單，要睇吓佢上年業績如何，唔掂就可能降佢
長期評級。今日跣低半成，收報４８﹒７銀，試過低見４８﹒０５銀創近７年低位。消息指大笨
象（００００５）會凍結高層晉升，亦跪低近４巴仙，收報５２﹒２５銀。
聯想（００９９２）中午派成績表，上季盈利好過預期有３億美金，中午開市後跌幅曾一度
收窄至唔夠１巴仙，但之後愈跌愈深，花旗指聯想收入比預期差，削目標價至７銀，結果全日唔
見一成收報６﹒６１銀，係全日最差表現藍戰士。
恆地（０００１２）今日錄得一手８億銀大手交叉盤，股價隨市向下，最終挫４巴仙，收報
３９﹒５５銀，跑輸同業，唔知四叔仲會唔會出手托一托呢？！
＊油股碌呀碌恆地四叔托？渣打七年低聯想急急落＊
花旗國油價嚇死人，再跌穿３０美金，全因為孖屐對達成減產嘅希望逐漸減退，同時冬季偏
暖令到需求唔夠。中海油（００８８３）一開波唔見近一成！到尾市上返Ｄ，但最終唔見４巴仙
，報７﹒２５銀；中石油（００８５７）就無咗４巴仙，報４﹒３８銀；街坊中石化
（００３８６）趴低３巴仙，報４﹒１８銀。
雖然１月份賭收好過預期ＤＤ，而且有唔少賓架對賭仔投以信心一票，但麥格理噚日就唱反
調，話仍然對賭仔持審慎睇法。結果，一班賭仔今日就隨市向下碌呀碌，銀娛（０００２７）、
美高梅（０２２８２）無咗近５巴仙同逾５巴仙，聽日除淨嘅金沙（０１９２８）都腳仔軟，跣
低逾３巴仙，收報２５﹒８５銀。但見麥見雪中送炭，真係要畀個「Ｌｉｋｅ」佢！
＊中鋁見異動威威逆市漲，天大與意科升得夠誇張＊
雖然個市好弱，但康健（０３８８６）今朝錄得１﹒７億銀非自動盤後，就逆市愈升愈有，
埋單踢起近７巴仙，破三條主要平均線，最後收報１﹒６銀，唔通有景轟？！
早前阿爺話６月底完成組建稀土大集團，中國鋁業（０２６００）急飆近３巴仙，報
２﹒４９銀，成交急增至６﹒９億銀，久違了嘅熱鬧呀。
獲得法國管材公司溢價近六成提全購嘅天大石油（００８３９），一開波爆六成，最終收報
１﹒６７銀，都有５９巴仙落袋，不過就未帶動得起其他石油管材佬造好。
第二日落鑊嘅意科（００９４３），逆市飛升對佢嚟講好似小兒科，升幅擴大到逾５３巴仙
，報０﹒１７銀。不過上個月先被洗倉，缸友小心啲好呀！請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
