《小傳日記》對華關稅暫未縮，魚缸表現好反覆！

　　期待已久嘅花旗國同神州嘅首階段貿易協議，終於喺隔晚簽署落實，神州將會購買２０００億美元嘅商品同服務，但關鍵之一嘅關稅問題仲未解決。花旗國總統侵侵（特朗普）就話，一旦中美完成第二階段貿易協議，就會取消對神州商品嘅所有關稅。香江孖屐靜觀其變，今朝高開３２點報２８８０６點之後就掉頭向下，最多跌６４點見全日最低位２８７０９點。不過，魚缸早段走勢反覆，喺神州磚頭佬急漲支持下，孖屐一度轉勢，飆逾２００點高見２８９８７點，直逼兩萬九，但唔夠半日就蒸發所有升幅。午後，魚缸窄幅上落，但臨埋單一腳踢高，收報２８８８３點升１０９點，主板成交１０１５﹒０２億銀，較上日微升１巴仙。
　　國貨報１１３２８，升３２點。手機設備佬瑞聲（０２０１８）挫近２巴仙，報６４﹒１５銀，係全日表現最差嘅藍戰士。
　　Ａ場方面，上證指數收報３０７４點，跌１５點或跌近１巴仙，深成指數收報１０９６７點，跌４點或跌唔夠半巴仙，兩市成交達６１２８﹒０１億人仔。
　　大隻藍戰士個別發展，大象（００００５）微漲１亳子報５９﹒９銀；ＱＱ（００７００）升近半巴仙，報４００銀；生發發（００３８８）滑逾半個巴仙，報２７８銀；ＡＩＡ（０１２９９）走高近１巴仙，報８７﹒３５銀；神州移動（００９４１）揚近半巴仙，報６６銀；神州上月新增貸款遜預期，建行（００９３９）軟約半個巴仙，報６﹒６９銀。

＊內房全起舞潤地最勇武，前景唔太差地產佬獲撐＊

　　神州磚頭佬今日個個都好醒神！有傳華潤置地（０１１０９）或者今年會分拆物管業務嚟香江上市，缸友聽到即刻掃拿拿臨掃貨，潤地埋單省鏡起飛逾３巴仙，報３７﹒７５銀。碧桂園（０２００７）彈逾１巴仙，報１２﹒２２銀。融創（０１９１８）跳起逾３巴仙，報４５﹒３銀。龍湖（００９６０）跳高近２巴仙，報３７﹒８銀。中海外（００６８８）踼高近３巴仙，報３０﹒３銀。
　　香江磚頭佬都唔輸蝕，齊齊跳彈床！有大行美人（銀）就話，預期今年磚頭「孖屐」上半年政治環境會比較平靜，同睇好下半年前景。美人將希慎（０００１４）升至「掃貨」評級，而收租佬之中首選恒隆（００１０１）同希慎。希慎埋單踼高逾２巴仙報３１﹒５銀，恒隆就彈近１巴仙，報１８﹒８８銀。九置（０１９９７）鏟起近３巴仙，報４８﹒４５銀。領展（００８２３）跳高近２巴仙，報８４﹒７５銀。鷹君（０００４１）彈一格報２６﹒４５銀。

＊協議唔減稅出口仍上去，帶採結果前藥佬漲勢現＊

　　花旗國同神州終於簽咗第一階段協議，但可惜係花旗國打算第二階段協議後先撤現有關稅，雖然係咁仍阻止唔到出口佬走高。敏華（０１９９９）漲近２巴仙，報６﹒４８銀；創科實業（００６６９）同申洲國際（０２３１３）走高近３巴仙，分別報６５﹒９５銀及１１６﹒９銀。另外，德昌電機（００１７９）首三季營業額僅跌４巴仙，全日飆超過６巴仙，報１８﹒７２銀。偉易達（００３０３）則滑２巴仙，報７８﹒７５銀。
　　聽日神州公布新一輪帶量採購嘅結果，但一眾藥股似乎唔受影響。大行大摩就出報告唱好，話雖然神州政府對藥企政策嚴，但係創新藥企或者可以受惠於監管環境，一班醫藥佬興奮到跳起。中生製藥（０１１７７）漲近５巴仙，報１１﹒３４銀，更加係全日表現最好嘅藍戰士；石藥（０１０９３）升超過２巴仙，報１８銀；國藥（０１０９９）揚１巴仙，報２９﹒４５銀。藥明生物（０２２６９）買咗德國生物藥製造設施用嚟擴大產能，全日踢高近６巴仙，報１０５﹒５銀。而康寧傑瑞（０９９６６）獲大摩首予增持評級，走高７巴仙，報１４﹒３８銀。

＊內房佬回暖物管升不斷，廣汽出澄清股價向下傾＊

　　連日受壓嘅內房佬今日終於回暖，物管佬順勢一齊升，繼續尋頂。濱江服務（０３３１６）急飆逾１３巴仙，報９﹒１５銀；新城悅服務（０１７５５）都彈起逾９巴仙，報１３﹒９８銀；奧園健康（０３６６２）升６巴仙，報６﹒５９銀；中海物業（０２６６９）漲４巴仙，報５﹒２８銀；碧桂園服務（０６０９８）揚逾２巴仙，報２９﹒６銀。
　　汽車佬走勢普遍偏軟，其中廣汽（０２２３８）澄清話無入股蔚來汽車，全日趴低４巴仙，報９﹒３９銀。華晨（０１１１４）挫逾２巴仙，報７﹒６６銀；東風（００４８９）滑超１巴仙，報６﹒９７銀；比亞迪（０１２１１）軟半巴仙，報４５﹒５銀；吉利汽車（００１７５）跌近１巴仙，報１５﹒８銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。