《小傳日記》曾失二萬六，轉眼又收復；成交現萎縮，反彈已結束？

　　花旗國公布最新初請失業金人數減少咗，但今個月製造業ＰＭＩ跌穿咗５０榮枯線，而缸友就睇實聯儲局主席鮑叔喺央行年會個Ｓｐｅｅｃｈ，花旗國魚缸噚晚（２２號）個別發展。香江今朝（２３號）無咩方向，都係睇啲魚毛嘅成績為主，於是牛皮高開９點，報２６０５７點，未幾調頭向下，曾挫最多１０８點，報２５９４０，穿二萬六。
　　不過，好彩部分重磅藍戰士成績表唔差，喺國壽（０２６２８）同ＡＩＡ（０１２９９）撐實之下，魚缸由跌轉升，中午前維護踢高逾百點，半日就繼續守返二萬六。下晝魚缸就比較穩定，後段更加跟住Ａ場走勢生猛返，高見過２６２４１，踢高１９２點，最終魚缸埋單進帳１３０點或半巴仙，收報２６１７９點，二萬六總算再次失而復得，主板成交約７４２﹒４９銀縮水逾半巴仙。國貨指數都跌逾半巴仙或７１點，報１０１９４點。
　　Ａ場表現回勇，上證收報２８９７點，升１３點。深成指收報９３６２點漲１１點。兩市合共成交４６９５億人仔。
　　重磅藍戰士，ＡＩＡ上半年純利增逾１倍至近３９億美金，今日鏟高近２巴仙，報７７﹒７５銀。有消息話生發發（００３８８）都極力遊說沙特阿美嚟上市，全日微彈８毫子，報２５２﹒４銀。人行印咗份金融科技發展規劃，ＱＱ（００７００）作為半個ＦｉｎＴｅｃｈ佬都有撐實，收高近１巴仙，報３３４﹒２銀。野村重申神州移動（００９４１）係三大神州電訊佬中首選，全日起哄近１巴仙，報６６﹒８銀。大象（００００５）就跟住魚缸收高近半巴仙，報５７﹒１銀。國壽中期純利多逾１倍，野村都維持佢「他屐」同評級，今日收高逾３巴仙，報１８﹒７２銀。
　　恒安（０１０４４）噚日放中期成績表，盈利按年少近４巴仙，今日繼續畀缸友追住掟，插水逾３巴仙，報５１﹒９銀，係表現最差國貨佬。

＊瑞聲表現灰手機股急回，比亞迪糟糕吉利續風騷＊

　　有傳蘋果將會喺９月推出三款新手機，作為供應商之一嘅瑞聲（０２０１８）本來朝早都有得升，點知下晝放咗榜之後，令「孖屐」大失所望，上半年少賺五成七，毛利率跌到２７巴仙，股價插水近４巴仙，報３６﹒９５銀，係表現最差藍戰士。另一個手機孖寶舜宇（０２３８２）都慘被連累，仆低近１巴仙，報１０５銀。最慘嘅莫過於比亞迪電子（００２８５），績後畀建銀國際降評級到中性，今日急挫逾７巴仙，報１０﹒５６銀。連早前被大行唱好嘅通達（００６９８）都要高開低走，全日原地踏步無升跌，報０﹒５８銀。
　　砵砵車今日繼續兩邊走，比亞迪（０１２１１）噚日急瀉近７巴仙之後，今日仲未止跌，走低近３巴仙，報３９﹒２銀，創超過３年新低。藍戰士吉利（００１７５）噚日踩行油飆近８巴仙之後，今日雖然都畀大和唱好，叫缸友掃貨，但表現有啲留力，只微升近１巴仙，報１１﹒９４銀。其他砵砵車下晝都跟住「孖屐」嘅升勢醒神，北汽（０１９５８）踢高近半巴仙，報４﹒５４銀。長汽（０２３３３）升近１巴仙，報５銀。華晨（０１１１４）今日放榜，起哄近１巴仙，報７﹒７１銀。

＊醫保錄換藥醫藥佬歡樂，燃氣兩極化新奧就最發＊

　　阿爺個醫保目錄大換血，被選中嘅藥品有高達１５０種，其中涉及３６家上市魚毛嘅藥品，所以醫藥佬連日嚟備受缸友熱愛。石藥（０１０９３）埋單起飛逾３巴仙，報１５﹒７銀，係全日表現最佳藍戰士，仲要七連升兼七連陽，累漲近三成二，勁！康哲藥業（００８６７）跳高近４巴仙，報９﹒８１銀。國藥（０１０９９）彈起近２巴仙，報２９﹒３銀。神州中藥（００５７０）有大摩撐腰，升佢評級到「增持」，埋單省鏡起飛超過一成二，報３﹒８３銀！藍戰士中生製藥（０１１７７）踢高逾２巴仙，報１０﹒７８銀。
　　神州燃氣佬兩邊走，新奧能源（０２６８８）中期純利多近九成，加上有野村維持佢「掃貨」評級同「他屐」，埋單起飛近一成，報８７﹒６銀，創超過一年新高，係全日表現最好國貨佬！潤燃（０１１９３）跳起近４巴仙，報３９﹒７５銀。昆侖能源（００１３５）彈唔夠半巴仙，報６﹒８銀。神州燃氣（００３８４）跳起近５巴仙，報３２﹒６５銀。天倫燃氣（０１６００）玩笨豬Ｊｕｍｐ，挫逾４巴仙，報８﹒８３銀。

＊上半年多賺碧桂園唔彈，旗下物管飆皆因業績驕＊

　　碧桂園（０２００７）噚日放榜，盈利比預估好按年增近２１巴仙，不過中金今日唱淡，仲降佢「他屐」近兩成到１１﹒４１蚊，雖然保住「跑贏魚缸」評級，但全日剎車逾３巴仙，報９﹒６銀。另外，阿爺社科院話銀行監管整體穩中求進，不過要切實遏制內房泡沫，其他內房佬表現都有啲曳。奧園（０３８８３）撻低近３巴仙，報１０﹒７銀。合景泰富（０１８１３）跣低逾２巴仙，報６﹒２４銀。四條三恒大（０３３３３）縮水近２巴仙，報１７﹒６２銀。金茂（００８１７）仆低逾１巴仙，報４﹒８１銀。
　　同內房佬有密切關係嘅物業管理佬普遍都省鏡，碧桂園服務（０６０９８）中期純利多逾７３巴仙，如果剔除上年一次性超額撥備，半年已經賺近一倍，今日當然鏟高近一成，報２１銀，高見過２１﹒４５銀，再創咗歷史新高啦！佢對手雅生活服務（０３３１９）都跟住起哄近７巴仙，報１５﹒６銀。新城悅服務（０１７５５）放榜之前有撐實，踢高逾６巴仙，報６﹒７６銀。無阿媽照住嘅和泓服務（０６０９３）鏟高剷９巴仙，報１﹒６４銀。中海物業（０２６６９）都蜈蚣彈近２巴仙，報３﹒８２銀。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。