按盤價 
《魚缸博客》今日魚缸低開超過３００點，主要因為阿里巴巴（０９９８８）、嗶哩嗶哩
（０９６２６）等科技股受到不利消息影響，前者旗下螞蟻集團未獲中證監評估重新上市，後者
就第一季淨虧損擴大。ＡＴＭ之後唔算跌得好多，無再推魚缸跌落深淵，車股亦反彈。只不過，
美國債息又升番，歐洲央行下個月都要加息，外圍環境轉差，顯得美國通脹數據非常重要喇，大
家要睇路呀！
今日博客同大家講下東方海外（００３１６），公司將會自１９７４年之後，第二次獲納入
做恒指成份股。股價早排升到嘭嘭聲，由３月份低位１５１﹒２６銀反覆向上，升到前幾日歷史
高位２８４﹒８銀，累計升咗８８％，升勢認真誇張。不過，股價噚日急跌１１﹒４４％，跟住
其他航運股沉晒，可能因為波羅的海綜合指數連跌好多日，噚日曾經由３２５３點跌至到
２４００幾點，大跌超過８００點！
＊染藍股多數無好結果？＊
唔講運價問題，自從藍籌股由過去５０隻，嚟緊分階段加到１００隻，染藍股表現反而走樣
，阿里健康（００２４１）、海底撈（０６８６２）相繼出事，前者由舊年２月高位３０﹒１５
銀碌碌碌，股價依家變咗單位數，並持續喺低位浮浮沉沉，買咗朋友心臟都搞到好唔健康！依家
「榮升」染藍股唔係好事，亦反映股價好大機會見頂，東方海外似乎係咁喇。
航運業始終係一個周期性行業，當貨運需求多咗嘅時候，就會加快造新船，但到新船造好喇
，貨運需求可能已經轉弱，航運公司就要減價。即係話，航運業好起上嚟好到飛起，但衰起上嚟
都衰到貼地。舊年就正係航運業嘅景氣時期，東方海外全年賺７１億美金，創公司成立以嚟最好
業績，股價開始「坐火箭升空」，但依家疫情令到貨運需求減弱，即使東方海外派息好闊佬，呢
個時候被納入做藍籌股，股價就更加有潛在回調風險。
＊短線２３０銀唔可以失＊
日線圖睇，股價升到２８５銀附近唔夠承接，保歷加通道開始收窄，１０天線都掉頭跌落去
，依家ＭＡＣＤ仲出現熊差，短線走勢麻麻哋。博客認為２２３銀唔可以失守，因為呢個位正係
３月尾嘅頂部，同時係５月２３日裂口高開嘅低位，由此推斷呢個係短線支持，萬一跌穿埋就要
睇２００銀邊。如果由３月２８日低位１５１﹒２６銀揸到依家嘅朋友，建議係時候減一減倉，
未有貨嘅朋友就留意２３０銀喇！
《編者按》本欄搜羅即市傳聞，惟消息未經證實，《經濟通》亦不保證內容之準確性。
夏日中暑高風險！即睇中暑迷思＋預防措施！► 立即了解
