《笑傲缸湖》出差開始首重環保，係疫後新常態定只係一時興起？

　　新冠疫情持續咗兩年幾，開始有唔少國家選擇同病毒共存，甚至開始解除部分防疫措施。例如南韓喺5月2號開始唔再要求大家喺戶外戴口罩喇，丹麥甚至喺5月中起開全球先河叫停打針計劃添。不過而家離出境暢遊仲有一段路要行嘅香港人都唔使咁快失望住，因為而家商務旅客又多番喇，而且無論係酒店定旅客都傾向行環保路線添。
　　聽旅遊平台TripActions講，單係今年頭3個月的商務旅遊booking就超出舊年全年整體數字嘅一半，今年3月係比舊年3月狂升875%！有啲人仲會借助遙距工作成為新工作方式嘅優勢，趁喺外國出差之餘喺當地玩多幾日，亦即係近年興起嘅「bleisure」外遊方式！而有5個國家嘅旅遊新常態都係行環保大方向嘅。
　　例如喺今年有最多商務booking嘅歐洲國家英國，倫敦有啲酒店以可持續方式營運，例如會用可持續發展方式生產嘅食材同設有原地堆肥項目。另外有酒店唔單只由酒上酒店改建而成，會捐出利潤畀全球社會事業添。
　　去西班牙嘅商務旅客就唔似以往一味留喺巴塞隆拿外圍，而喺鐘意親近郊外多啲。啲企業甚至開始增加要求用電動或混合動力車輛代步，揀同當地企業多過跨國企業合作添。
　　而喺有最多商務booking嘅拉美國家墨西哥，位於全國第二大城市瓜達拉哈拉嘅全國最大會議中心Expo Guadalajara喺疫情期間投資2300幾萬墨西哥披索設衛生設施，畀人做病毒測試程序同埋建立隔離區，有新酒店仲供應以當地農產品做主打嘅素食菜式添。
　　印度接到嘅商務booking都好多，仲有酒店改善防疫措施，會幫人探熱之餘仲推行無觸式check-in同check-out，仲會收集雨水重用、種土生植物同埋設有有機花園添。
　　加拿大溫哥華就有酒店提供免費單車畀住客使用，仲提供標榜以用剩嘅食材同減少用水炮製嘅「零浪費雞尾酒」(zero-waste cocktail)，好潮！
　　睇嚟一場世紀疫情唔單只令大家更珍惜自己嘅健康，仲會反思到只有令地球健康，人類先至可以活得更長久同安心，呢樣真係好大嘅得著。不過盈盈覺得最重要都係呢個反思結果唔好只係一時興起先至配合，而係要持久實行甚至一路改進，咁先至睇到長遠嘅效果㗎。《任盈盈》

《編者按》本欄搜羅即市傳聞，惟消息未經證實，《經濟通》亦不保證內容之準確性。