《笑傲缸湖》印度神童預言世事夠晒威，但其實只係父母嘅搖錢樹？

　　早兩個禮拜港股好似過山車，每日上落吓吓都以千點計，股民少啲定力都可能會嚇到個心離一離。當其時，近年因疑似屢次準確預言世界局勢而爆紅嘅印度神童阿南德仲湊吓熱鬧，借助星象預言今年3、4月股市會遇到三個關鍵日子，令佢紅上加紅之餘，有啲人開始對佢嘅背景發生興趣。但印度有傳媒用心追蹤下，發現阿南德可能只係因父母精心安排財路而出盡鋒頭嘅後生仔而已。
　　聽講阿南德最初係喺印度報紙嘅地方教育新聞裡面亮相嘅。2013年2、3月嗰陣，《印度時報》同《班加羅爾鏡報》都有講當時8歲嘅阿南德對宗教史詩同經文過目不忘，對數學特別拿手。
　　喺其後嗰7年，父母幫阿南德將自家影片放上YouTube頻道，內容係表演背誦經文，又或者係播佢妹妹唱歌跳舞，偶爾父母都會上鏡。後來阿南德再大小小，就開始喺片度講啲比較複雜嘅內容，十幾歲仔就對住鏡頭講自己鑽研度占星學嘅心得。
　　到咗2020年5月，當時14歲嘅阿南德仲攞咗個號稱具備「全球公信力」嘅GCPA神童獎。當時佢係以「世界最年輕嘅占星家」名義獲獎，但呢個獎點樣鑑定就無人知。印度獨立媒體《BLTIZ》就話實呢個獎可以用「金錢贊助」買通，仲直指阿南德根本就係一個「被人為刻意製造出嚟嘅假神童」添。
　　阿南德目前確實提供印度占星服務。佢嘅網站有價目表，個人諮詢每半粒鐘收費217美金(約1700蚊港紙)，商界諮詢就每45分鐘收費340美金(約2633港紙)。
　　坦白講，盈盈好佩服印度傳媒行家鍥而不捨去將阿南德起底嘅專業精神，仲有少少破除迷信嘅意味。不過阿南德又點解會紅呢？咪就係因為身處亂世人心惶惶嗰陣，「不問蒼生問鬼神」。而且睇番阿南德發表預言嗰陣都唔係好煽情，最多咪呼籲眾生注意健康呀咁，都係一啲老生常談，如果佢嘅fans照足佢咁講去做，都無傷大雅，最緊要理性看待就得喇。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。