《魚缸博客》農夫山泉舊年多賺三成六，現價買入唔太著數？

　　仲有幾日就到季檢，魚缸今日仲keep到升勢，其中染藍無耐嘅農夫山泉(09633)放咗榜，成績又點樣呢？
　　截至舊年12月底為止，農夫山泉年度純利71.62億人仔，按年升35.7%；收益296.96億人仔，按年升29.8%；毛利176.56億人仔，按年升30.7%；每股基本盈利0.64銀；派末期息每股0.45銀，按年增加1.65倍咁多！
　　其中，包裝飲用水產品收入170.58億人仔，按年增長22.1%，佔總收入比例57.4%，仍然係集團主要收入來源；茶飲料產品舊年收入45.79億人仔，按年亦增長48.3%；功能飲料產品、果汁飲料產品嘅增長都有超過三成。
　　不過，農夫山泉講到，未來可能再出現新冠變種病毒，今年初神州多個城市都面臨疫情升溫考驗，俄烏局勢亦未穩，加上PET塑膠等原材料採購價格顯著上升，包裝物、能源價格有上升趨勢，集團旗下包裝飲用水同飲料生產成本可能有上升壓力。
　　睇日線圖，股價受到呢份成績表推動，高開近6%，早段都保持都升勢，10天線同20天線越貼越近，MACD牛差距仲keep住平穩，走勢都唔錯。不過，股價由3月1號高位49.95銀回落，最低見過32.35銀，按照黃金比率回調嘅指標，由呢兩個位量度，初步目標望住61.8%反彈位43.2銀。事實上，農夫山泉曾經喺上星期二(22日)升到43.25銀，但之後幾日都未能承接升勢，估計43.2銀都有幾大阻力。博客覺得現價買入唔太值博，可以等佢回到36.5銀先再部署。

　　《編者按》本欄搜羅即市傳聞，惟消息未經證實，《經濟通》亦不保證內容之準確性。