《笑傲缸湖》史上最大韭菜被割：幣安英雄代幣大跌近九成！

　　「Game Fi」呢個新字近期成為網絡熱門搜查詞語，皆因打機可以賺錢呢啲咁筍嘅野就梗係個個都想啦！不過新野出現之後，一不小心就容易被人割韭菜啦！好似最近推出嘅幣安英雄（BNB HEROES)，係昨晚發生發生大量擠兌，目前遊戲獎金池近乎歸零，遊戲代幣價格亦下挫近九成，究竟發生咩事呢？
　　呢隻「幣安英雄」開宗明義就係打機賺幣安幣（BNB)，並係幣安鏈上面運行，一直都相安無事，而呢隻「驚」嘅獎勵池原本仲有兩萬幾粒幣安幣；不過係無預警情況下，昨晚突然有大量幣安幣被提出，直到個池剩返3000枚幣安幣時候，官方甚至將獎金池鎖住！
　　雖然幾個鐘頭後解鎖，獎金池繼續被人提款，最後個池嘅獎金被人一掃而空，剩返1.65美元，呢隻「驚」嘅獎金幾乎歸零；而呢款遊戲嘅原生代幣BNBH，亦從高位約3.33美元直瀉，目前僅值0.3649美元，大跌88%。
　　點解呢波韭菜被人割得咁應呢？有玩家解釋，出現呢個情況有三個可能性：第一個就係部分玩家因為官方修改獎勵機制導致不滿而拋售　BNBH；第二就係新出遊戲角色有bug，可以賺到大量BNB，而導致獎勵池崩潰；第三就係項目方惡意擠兌、捲款走路。
　　究竟係咩原因就真係不得而知啦！不過大家都覺得係項目方走路機會比較大，所以係內地已經有大班苦主組成維權群組，希望透過法律手段申訴，至於屬真屬假就要等事件發酵，不過Game Fi其他幣都出現大跌情況，唔知係咪睇見隻BNBH咁危險，大家都係套現觀望先啦！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。