RSS訂閱 過兩日就係美國感恩節喇，當然唔少得應節嘅大大隻火雞。不過美國近排「暫時性」嘅通脹咁勁，有統計就話今年十人一圍嘅火雞餐，平均就要53.31美金，貴過舊年成14%，於是唔同學者專家就積極咁分析捱貴雞嘅原因。
根據美國農場局聯合會調查，應節火雞餐係貴咗，但其實好多種材料都係貴少少，加價最甘嘅就係最緊要嗰隻雞。一隻16磅重嘅火雞就由舊年嘅19.39美金，升到今年嘅23.99美金，升幅24%，單係火雞嘅升幅，就已經佔咗全餐升幅嘅72%！
另外，美國農業部報告顯示，8-16磅冰鮮火雞今年賣1.41美金一磅，貴咗兩成二，新鮮火雞仲賣1.47美金一磅！有學者就解釋，火雞價飆升係因為整體市場數量比舊年少咗6%，主要就係因為疫情反覆之下，供應商都難以估計火雞嘅需求量。但係又有專家意見話，主要係因為通脹，令到運輸等等嘅成本上升而令雞價向上。
講起通脹，又有調查發現有88%美國人都擔心通脹情況，繼而採取唔同嘅慳家大法，其中最多嘅48%人就會少啲出街食飯，另外有30%人就會換少次電話電腦等等。
不過節都係要過，有人就建議不如反傳統，直接cut走隻雞，咁全個應節餐就只係貴咗6.6%，比起原本14%就少得多。不過盈盈覺得，「走雞」慳到今年，又慳唔慳到下年呢？今年唔食雞，下年唔食椰菜仔，慳慳吓咩都唔駛食啦！所以降低物價先係最好方法。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】本港無人駕駛自動車最快本月底試運，你會否乘坐？► 立即投票
