《笑傲缸湖》神州多處野豬多，網民：點解唔可以食用被殺野豬？

　　野豬問題近日喺香港備受關注，尋日漁護署人員就喺南區深灣道，用麻醉槍捕獲7隻野豬，並注射藥物人道毀滅。喺神州多地野豬都氾濫，有網民就問點解唔可以將啲捕殺後嘅野豬食咗去。
　　喺四川通江縣，大約有2萬幾隻野豬，數目都唔細。國家林草局早喺今年7月，將通江縣列入四川省4個野豬致害防控試點縣之一。當局表明，野豬獵捕要由專業獵捕隊以槍獵、籠捕、圍欄誘捕，唔畀用電擊、獸夾等非法手段獵捕。根據要求，2021年通江縣計劃獵捕野豬750隻。
　　有農民話自己維護自己莊稼同時，又唔可以非法捕獵野豬，不時發生野豬傷人事件。於是，佢就請咗四川省唯一一支擁有持槍證的專業隊伍獵捕。近日，喺通江縣亦有野豬捕殺活動，並對被捕殺嘅野豬用生石灰消毒，就地挖深坑掩埋做無害化處理。
　　唔少網民唔明點解要對野豬無害化處理，話野豬好食味香，若果可以畀民眾捕殺食用，相信野豬數量好快會減少，「埋了幹啥，吃肉啊！」、「野豬肉是個好東西，脂肪很少，全是精肉」、「野豬可是天天運動的啊，都不是虛肉，內質多好」。
　　國家林草局主管的《中國綠色時報》援引專家觀點回應，話國內明文規定嚴禁食用野生動物，捕殺咗嘅野豬一定要按照標準流程處置。捕殺量比較大情況之下，經過嚴格檢驗檢疫同專業部門處理，可以加工成動物飼料，效果唔錯。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。