RSS訂閱 如果馬斯克某一日話想沽一成Tesla股票交稅，你會唔會支持呢？佢近日就喺Twitter開post畀網民投票，結果引嚟超過350萬人投票，當中有近五成八網民支持馬斯克沽貨！
馬斯克揸住嘅呢一成股票有幾多？相當於1.705億股，再睇埋上星期五(5日)收市價1222.09美元，如果真係沽貨，馬斯克可以套現約210億美元，即係話成16252億港紙！
點解咁突然開po想沽貨？馬斯克話自己無喺任何地方攞人工或者獎金，自己淨係揸住股票，要交稅嘅唯一方法就係賣股票出去。佢重申無論投票結果點樣，都會「全單」收晒，唔會「走數」。
馬斯克喺未來幾個月，可能要面臨超過150億美元嘅期權稅單。按照美國法律，期權收入將會按照最高普通收入水平徵稅，即係近四成淨投資稅。馬斯克本身係用加州居民身份，攞到大部分期權，必須額外畀加州政府13.3%嘅稅，加加埋埋都有150億美元。Tesla最近亦透露，馬斯克之前以股票作為抵押，向金融機構貸款，通過出售股票，馬斯克可望償還部分貸款。
馬斯克可能大把稅交，急住沽貨套現唔出奇嘅。不過，Tesla今年股價升咗唔少，10月尾更加突破1000美金大關，今次馬斯克藉交稅為由，出售一成股票，會唔會搞到股價擢一擢呢？呢個po又係咪時候提醒大家，係時候沽貨呢？盈盈拭目以待呀！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【與拍賣官看藝術】常玉作品屢創天價，背後其實藏著跌宕起伏的人生► 即睇
