《魚缸博客》中海油服（２８８３）油水可再提升，破頂後仍夠衝勁

　　雖然近期油價謝晒，再次回跌番落百蚊美金水平拉鋸，但搞掘油周邊設備嘅中海油服（０２８８３）就有理無理，做番場好戲畀大家睇。佢哋啱啱派季度成績表，今年頭３季嘅油水大升四成，連一眾掘油佬都望門輕嘆。
　　中海油服交到功課，自然得到吹水佬嘅寵愛啦，瑞信亦即走嚟錦上添花。佢哋大讚公司季績令人喜出望外，所以睇好佢將「跑贏大隻佬」，另將「他劇」升至２５蚊，仲話油水有潛力再上升，指佢增長前景及油水可見度仍被低估添。
　　孖屐憧憬歐洲經濟經甦，原油需求上升都理所當然，所以中海油服嘅掘油器材需求與日俱增亦可預期，但問題係現價追貨抵唔抵呢？喺今日喜訊刺激下，股價已成功破頂，喺ＭＡＣＤ圖中更現「雙牛」嘅利好訊號！可見短線仍可再衝刺。
　　若缸友怕接火棒，不妨等股價攤凍番少少，待見落返去捱近廿蚊嘅平台整固位先吸貨，可預期升勢仍陸續有嚟。

　　《編者按》本欄搜羅即市傳聞，惟消息未經証實，《經濟通》亦不保證內容之準確性。