《魚缸博客》全球肥料醞釀劈價，中海化學（３９８３）咪手多撈貨

　　外電指，地球表面最大嘅肥料廠宣布同拍檔拆夥，有望令價格壟斷局面成歷史，有吹水佬預期全球肥料價有望暴跌２５％。
　　仲記得年頭時，因祖國肥料出口跌ｗａｔｔ，搞到阿爺出手減關稅，就知孖屐競爭幾大。喺肥料嘅孖屐中，唔少貨都主銷去周邊地區，而家鄰國俄羅斯玩劈價，睇怕手尾都幾長，而同病相憐嘅行家、歐洲最大嘅鉀肥生產商Ｋ＋Ｓ，股價喺噚日（３０日）暴瀉兩成幾，就知陰功豬啦。
　　喺魚缸都有唔少股仔中流彈，就好似喺上個月剛喺楓葉國買兩成鉀肥公司股權嘅中海油化學
（０３９８３），股價即時碌低５％，創三年半新低；而中化肥（００２９７）亦挫逾６％，創一年低。
　　喺肥料嘅世界裏面，從來都無話邊間係龍頭，事關肥料又唔係咩高科技，所以競爭好激！再者，唔同廠嘅肥料成分其實都差唔多，客仔主要睇價錢買貨，若展開劈價戰，死傷定必慘重，所以買肥料股，咪使旨意做肥仔。

　　《編者按》本欄搜羅即市傳聞，惟消息未經証實，《經濟通》亦不保證內容之準確性。