《魚缸博客》矽谷銀行爆煲事件,聯儲局決定出手拆局,「孖屐」隨即轉風向,預期聯儲局
因為呢件事而唔會進取加息,缸友都無睇得咁悲觀。魚缸今朝反彈,曾經升超過400點。
有隻科技股升得唔錯,就係百度(09888)。公司即將面世嘅AI聊天機械人「文心一
言」,已經令缸友為之雀躍,不斷落鑊炒。最近公司宣布,喺海外上線咗一款AI聊天APP「
WiseAI」。據產品官方介紹,呢款AI機械人先進嘅算法同尖端自然語言處理技術,能夠
輕鬆進行復雜對話,可以根據用戶喜好,幫助舒緩心情,緩解壓力,改善整體健康狀況。
另外,呢款AI聊天產品擁有理解同響應自然語言命令嘅能力。百度指,同其他依賴預先編
程嘅響應,或者有限關鍵字識別嘅聊天機械人唔同,「WiseAI」使用先進機器學習算法,
以一種感覺自然同直觀方式,解釋同響應用戶消息。
百度呢款AI聊天APP係咪幫到人類做到心靈上嘅治療,的確要啲實績睇下,但孖屐已經
炒住先。股價今朝曾經升超過5%,暫時仲未失守250天線。如果「WiseAI」喺海外受
歡迎嘅話,對公司盈利相信有幫助,短期內仲有炒作空間。依家可以小注買入博繼續反彈,目標
170銀,失守100天線先止蝕。
《編者按》本欄搜羅即市傳聞,惟消息未經證實,《經濟通》亦不保證內容之準確性。
《說說心理話》關於「沉迷成癮」:點預防同戒甩鋪癮?最重要改變一樣嘢!追星都算成癮?► 即睇