《魚缸博客》康希諾上日大升今朝急跌，炒疫苗股切忌跟車太貼！

　　《魚缸博客》打完風之後，魚缸今日曾經跌超過５００點。無計，鮑威爾話議息之後開始傾
緊減慢緊縮步伐，但「唔可能太快停止加息」。佢咁講完，可能令到市場嚇一嚇，魚缸又跌過都
唔太意外嘅。
　　今日文進想同大家講下康希諾生物（０６１８５），公司股價噚日急升６３％。有傳媒報道
，康希諾生物吸入用重組新型冠狀病毒疫苗「克威莎霧優」喺江蘇１３個城市陸續開始接種，其
中無錫、淮安同揚州率先開放預約和接種工作，可以為市民提供唔用打針嘅疫苗接種服務。
　　不過，康希諾之後發公告指，基於當前嘅免疫策略同國內加強針接種率較高嘅情況，公司預
期「克威莎霧優」唔會為公司業績帶嚟大幅增長。呢份公告就好似一盤冷水淋落嚟咁，股價今朝
曾經跌超過三成。
　　事實上，公司近日公布第三季虧損４﹒８６億人民幣，同舊年同期賺３﹒９億人民幣差好遠
，主要因為新冠疫苗需求量大幅下跌，同埋產品價格調整所致。雖然阿爺目前為止仲係用緊「動
態清零」政策，但係暫時未見疫情有大幅度急升嘅情況，到底康希諾呢支「克威莎霧優」疫苗，
可唔可以為公司扭虧為盈，的確有個疑問喺到。
　　唔止基本面，康希諾由１０月１２日低位４０﹒１銀開始上升，直至噚日高位１４７﹒５銀
計，股價累計升咗超過２﹒６倍。呢幾日炒完疫情消息，加上公司發出嘅公告，今日股價隨即回
調，相信未必咁快再現升勢，畢竟９日ＲＳＩ前幾日已經升破晒嚴重超買區。想買嘅朋友，依家
唔建議再追，可以等股價落番１０天線（約７５﹒８銀）再入手。最後藉今次康希諾呢個
ｃａｓｅ提醒大家，炒疫苗股切忌跟車太貼呀！
　
《編者按》本欄搜羅即市傳聞，惟消息未經證實，《經濟通》亦不保證內容之準確性。