《魚缸博客》博客今日同大家講下吉利（００１７５），集團上日收市後公布，６月份總銷
量１２﹒６６萬部，按年增長２６％，按月增長４２％。其中，純電動車銷量１﹒９６萬部，按
年升３﹒４３倍；插電式混動車銷量１﹒０１萬部，按年升５﹒３４倍；油電混動車銷量
３１７０部。
汽車股呢排走勢唔錯，主要因為阿爺不斷提到促進汽車消費嘅政策。商務部等１７部門再發
布鼓勵汽車消費措施，提到為咗提高汽車流通、擴大汽車消費，多部門研究免徵新能源汽車車輛
購置稅政策到期後延期問題，開展新能源汽車下鄉活動，支持充電設施建設等。
最新有消息話，山東省印發繼續實施促進汽車、家電消費政策通知，推動山東省消費市場加
快回暖。《通知》明確，山東省７月將新發放２億元人民幣乘用車消費券，發放商用車消費券
１﹒２億元人民幣總額不變，前期未核銷資金繼續用喺消費券發放，發放時間延長至７月底。
阿爺力谷汽車消費，吉利又有銷量增長嘅利好消息加持，今日高開３﹒７７％，最高見
１８﹒２８銀，但早段升幅好快收窄到唔夠１％。喺日線圖到，吉利喺４月２５號自低位
１０﹒４７開始反覆上升，但升到６月２８號高位１９﹒２銀開始整固。依家雖然升破１０天線
，但現價同１９﹒２銀年內高位相差無幾，而早段升到１８銀水平後顯然唔夠承接力，現價買入
唔太值博。博客覺得大家不妨等股價回到２０天線１６﹒４銀先買入，失守５０天線就止蝕。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】中央接連推出惠港措拖，你認為是否能刺激香港經濟？► 立即投票
