《魚缸博客》二線城市力谷樓市，碧服短線仲有反彈空間？

　　《魚缸博客》博客今日（２１日）同大家講下碧桂園服務（０６０９８）。上星期教育股炒
得勁，今個星期相信到內房同物管股喇。當然，內房股近期有啲消息支持。
　　溫州樓市自２０２１年８月以嚟跟住整體樓市下行。今年頭５個月，溫州全市商品住宅累計
供應１７０﹒０１萬平方米，按年跌４８﹒７％；銷售面積為１６１﹒４萬平方米，亦按年跌
６０﹒８％。
　　有見及此，溫州住建局再發布１５項支持合理購房需求政策，包括降低首套、二套商貸首付
比例、第一次喺市區買房會有購房款０﹒６％消費補助、提高公積金貸款額度同降低首付比例、
利用房票加速拆遷安置等。有分析指，對購房款０﹒６％消費補助，意味溫州市區「房子去化」
比較慢，需要吸引購買人群到市區買房。
　　近排二線城市開始力谷樓市，而多間房企嘅樓房成交同銷售跌幅未有擴大，消息令到內房同
物管股回升。當中，碧服噚日有顯著反彈，做埋最佳藍籌。睇番日線圖，噚日一支大陽燭已經突
破由５月初開展嘅橫行區頂部，今天早段延續升勢，曾經升超過４％，１０天同２０天線都向上
升，以依家９日ＲＳＩ只係約６０幾，加上資金開始流番入內房股嚟講，博客覺得碧服短線仲有
得彈。
　　之不過，內房債務問題仲未完全解決，二、三線城市交投情況仲要觀察，博客建議部署上以
短炒為主，初步目標３６銀，跌穿２９銀就止蝕。

《編者按》本欄搜羅即市傳聞，惟消息未經證實，《經濟通》亦不保證內容之準確性。