《魚缸博客》長汽頭五個月銷量跌１９％，車股升浪差唔多完？

　　《魚缸博客》魚缸今日開市早段當然唔係好，但又唔係好差，好淡友喺條百天線２２０００
打交打得幾厲害，今日收市如果升得穿百天線，升番去４月高位２２５２３機會高啲，否則可能
要整固一陣喇。
　　繼吉利（００１７５）之後，長汽（０２３３３）噚日收市都公布咗今年頭５個月汽車銷量
，累計４１﹒７３萬台，按年跌１９﹒３６％；汽車產量４２﹒５５萬台，按年都少咗
１５﹒５６％。單計５月嘅汽車銷量，長汽累計賣咗８﹒０１萬台車，按年跌７﹒９４％；汽車
產量８﹒４３萬台，按年就升４﹒１２％。只不過，無論係５月同頭５個月汽車銷量定產量，唔
好講比亞迪喇，長汽仲未追到吉利同廣汽（０２２３８），後者喺５月銷量按年更加有增長，長
汽嘅情況似乎仲未好轉。
　　另外，汽車股受惠喺汽車補貼、減徵部分乘用車購置稅、汽車下鄉等政策出台，股價升得幾
多。單計長汽，由５月份年內低位８﹒９６銀到前幾日高位１５﹒３８銀，已經升咗超過７０％
，９ＲＳＩ貼近超買區。近日長汽受制於百天線，連續幾日喺１５﹒３銀水平爭持，今日早段先
開高後走低，而保歷加通道都開始變得平穩。博客覺得汽車股利好消息炒到水尾，扶持政策出台
對車企幫助幾大先係依家重點，加上今日魚缸有啲回調，現階段再追車股唔太值博。
　　部署方面，博客認為大家可以分階段吸納，等股價回到１３﹒９至１４銀左右買第一注，如
果跌到１３﹒４至１３﹒５銀再買，最後咁不幸跌穿埋１２銀嘅就止蝕離場。

《編者按》本欄搜羅即市傳聞，惟消息未經證實，《經濟通》亦不保證內容之準確性。