《魚缸博客》魚缸銳不可當！禮拜一升完６００幾點，唞咗一日之後今日再嚟過，上晝最多
升差唔多５００點，多得阿爺又放寬打機，批多６０個遊戲版號，科技股勁升，魚缸都水漲船高
。
大升市下科技股表現一定唔差，隻阿里（０９９８８）今朝走勢非常強勁，連升第三日之餘
，仲突破埋１００天線，對上一次掂到百天線已經係舊年２月１８號。睇埋其他線，１０天線呢
幾日都拗緊腰上去，破埋廿天線出咗個小交叉，係利好後市訊號，走勢嚟講真係大旺！
最新就連惠譽都唱好阿里，話雖然宏觀經濟嘅不確定性、競爭加劇同消費行為變化減慢咗阿
里全個財年嘅收入復甦，不過就睇好公司嘅成本優化同營運現金，應該會有助抵銷上面提到嘅任
何負面影響，而阿里嘅評級空間仍然係惠譽評級嘅中國科企入面最高。惠譽就睇好集團收入將會
喺６月季度見底並溫和恢復，估計阿里收入喺２０２３財年會有中單位數增長。
睇返阿里今朝大戶成交維持積極，不過睇到淨流入有開始減少嘅跡象，而且破咗１０５之後
沽盤都稍為多少少，可能會有多少少阻力。不過回落都係買入良機，始終阿爺鬆綁，魚缸之後都
傾向睇好，回落之後都上得返，所以就睇住５０天線大概９５﹒５銀做買入位先，短期睇住
１２０銀先！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【香港好去處】etnet全新頻道盛大推出！全港最齊盛事活動資訊盡在掌握！► 即睇
