《魚缸博客》瑞聲被踢出恒指，慣例會照炒一輪？

　　《魚缸博客》最新恒指季檢出爐，四隻新股粉染「藍」包括方海外（００３１６）、中升
（００８８１）、中芯（００９８１）及中國宏橋（０１３７８），而瑞聲（０２０１８）就會
被踢出恒指，其實都唔太意外，瑞聲股價高峰時期見過１８０蚊，而家只係剩返１０幾蚊，真係
喊出黎。
　　其實公司變成咁，早已有小小味傳出，大家都知道瑞聲一路都係做蘋果手機產品，但係早幾
年公司話「擴大安卓手機市場的佔比」，當時博客已經心有一二，做開蘋果無啦啦話擴大市場，
一係你就提高自己生產量，但又未聽聞到公司擴大生產線；另外一個解讀就係公司已經預測到未
來蘋果訂單減少，所以同大家做定「功課」先咁解。
　　最後而家股價已經跌到落谷底，仲要被人踢出恒指，今日仲跌多５％，係咪真係咁差？博客
又覺得未必，皆因被踢出恒指，被動基金就會出貨，出貨就會交投提升，又交投就會有波幅。
　　況且，過往都有情況就係，被納入股份就會跌（因為大家消息已經炒完，所以出貨），被踢
出股份就會短線炒高。所以有唔少短炒客都會炒多一兩轉，分分鐘執幾餐茶都有機會。
　　今日瑞聲跌過落１６﹒５，最近都係見過１５個幾，其實都係鐵底，博客覺得現價短炒買小
小都無有怕，目標價可以睇１８至２０蚊左右，視乎有無成交，目前ＭＡＣＤ同ＲＳＩ都幾正常
，所以有閒錢可以試試佢，跌穿１５蚊就好走啦！
　
《編者按》本欄搜羅即市傳聞，惟消息未經證實，《經濟通》亦不保證內容之準確性。