《魚缸博客》今日魚缸早段曾經失守兩萬關，主要受到美國嗰邊大冧市有關，好多隻中概科
技股都跌埋一份，ＡＴＭＸＪ跌得多，魚缸自然要向下走。依家仲ｋｅｅｐ住「一頂低過一頂」
，睇怕短線走勢唔會太好。
繼京東（０９６１８）之後，騰訊（００７００）都公布咗季績，純利按年跌５１％到
２３４﹒１３億人仔，收入微升０﹒１％到１３５４﹒７１億人仔，經營盈利就按年跌３４％到
３７２﹒１７億人仔。比較多人關心嘅相信係遊戲業務，騰訊第一季本土市場遊戲收入跌１％到
３３０億人仔，主要因為未成年人保護措施對活躍用戶同付費用戶數量造成影響，國際市場遊戲
收入就增長４％到１０６億人仔。
另一個焦點係騰訊嘅廣告業務，第一季網絡廣告業務收入按年跌１８％到１８０億人仔，社
交同其他廣告收入都要跌１５％到１５７億元，媒體廣告收入更加跌３０％到２３億元。換言之
，騰訊呢份成績表當中，廣告收入可以話係「重災區」。
騰訊首席戰略官Ｊａｍｅｓ Ｍｉｔｃｈｅｌｌ話定畀大家聽，公司有信心後續批出遊戲版
號中，會有騰訊遊戲，但整體嚟講獲批嘅遊戲數量將會減少。佢又話受疫情影響，神州消費、物
流同金融發達城市都受影響，預計廣告業務今年下半年將持續受影響，廣告業務復甦時間表有變
添。
雖然博客預咗騰訊、京東呢啲科網企業第一季嘅成績表唔會靚，只不過講到底科技股都係講
增長，阿爺監管、疫情衝擊、加息周期、中概股除牌陰霾等，呢幾拳打到佢哋謝晒，「孖屐」亦
預期唔少科網企業嚟緊盈利增長會繼續放緩，科技股暫時好難再ｋｅｅｐ住爆升。部署嚟講，騰
訊繼續炒波幅先，４月２５號低位３２５銀水平唔可以失守，否則就可能下試３００附近位置，
大家可以喺３２５銀開始分階段吸納，上望目標３７０銀，跌穿２９７銀就止蝕離場。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【香港好去處】etnet全新頻道盛大推出！全港最齊盛事活動資訊盡在掌握！► 即睇
