《小傳日記》馬交嚴打地下換錢！賭場再創輝煌難過上天？

　　《小傳日記》計劃永遠追唔上變化，失去貴賓廳呢棵搖錢樹嘅賭股，單靠中場同非博彩元素
嘅生意都未站得住腳，就要面對又一波打擊。馬交立法會最近就討論有關《非法賭博犯罪法》修
例，計劃進一步打擊換錢黨。
　　「換錢黨」簡單嚟講就係做換錢生意，通常以低於市價兌現金，尤其係針對超出上面可兌換
限額嘅鉅額現金，就會幫襯換錢黨，暗地裏換錢。澳門立法會上星期五（９日）就討論，計劃將
賭場範圍內兌錢列為刑事，最高判監五年；如果賭場以外兌錢，就會按金融法律判行政罰款，而
酒店及商場等都算係賭場附屬相鄰設施，都會視為賭場範圍。
　　大家都知「換錢」嘅最大莊家經已伏法，於是自今年開始，取而代之嘅換錢黨就應運而生。
換錢黨嘅服務對象係大額現金，因為超過神州嘅出境限額，所以先要搵換錢黨，換言之又中咗阿
爺最棹忌嘅「大額走資」。所以自今年第二季起，神州同澳門兩地都明顯加強打擊換錢黨，到三
中全會前後就開始有成績，其中一單仲成功捉拿到一個每年賺超過１５億銀港紙嘅幕後金主。
　　實際上，就算唔計走資，由換錢黨引發出嚟嘅罪案今年一單接一單。就喺上星期，澳門又出
現一單涉及換錢黨嘅劫殺案，一個做換錢黨嘅港男之前賭贏咗２５０萬銀，被自己嘅換錢黨徒弟
知道後，於是就被謀財害命。所以除咗走錢之外，換錢黨都已經引發馬交嘅治安問題。
　　記得今年三中全會前，太陽城集團出咗一篇疑似係洗米華口吻嘅公開信，疑似係想喺阿爺面
前攞返啲加分位。但期間阿爺就開盡ｔｕｒｂｏ打擊換錢黨，算唔算係側面請緊食檸檬呢？請請
！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。