《小傳日記》「下沉市場」代表一個潛在新市場？定係消費力降級？

　　《小傳日記》內地近年網絡術語愈來愈多，類似「潤，躺，卷（內卷）」層出不窮，一個唔
覺意跟唔切，隨時會同內地市場脫節。只可惜，大多數術語都唔係啲咩好嘢。除咗上述提及呢幾
個術語之外，仲有個叫做「下沉市場」。筆者第一次?到「下沉市場」時，仲以為講緊消費力下
降，原本嘅高端客戶群，因為經濟不景氣、收入驟降而跌落中端消費層。而中端消費群又因為收
入減少，跌落低端消費層，如此類推。
　　但原來所謂嘅「下沉市場」唔係講緊呢樣嘢，而係指內地三線以下城市、管轄區以內包括鄉
鎮及農村嘅龐大消費群。聽落並無筆者諗得咁負面，相反地，「下沉市場」隱含十億人口嘅龐大
市場，代表未來一個大商機。不過，「下沉市場」雖有龐大市場待開發，但呢個市場大而分散，
價格敏感度高。唔似一二線城市咁高度開發，人均消費力自然也有所不及。
　　昨日（１１日）內地交通部發布數據，端午節假期（６月８日－１０日），全社會跨區域人
員流動量６﹒３８億人次，日均２﹒１３億人次，比２０１９年同期增長１６﹒６％，比
２０２３年同期增長９﹒４％。當中，民航三天內發送旅客５５３萬人次，比２０１９年同期增
長７﹒５％，比２０２３年同期增長７﹒９％。儘管旅客人數增多，但機票價格反而大幅跳水，
令人大跌眼鏡。
　　民航機票價格延續下行趨勢。國內機票經濟艙含燃油附加費均價５８０人幣，比２０１９年
下降１０﹒４％，比２０２３年下降２５％，比起上月嘅「五一黃金周」價格更大跌約
２８﹒２％，部分國內航線票價甚至低於或接近高鐵價格。有內地研報表示，端午假期嘅消費延
續五一嘅「下沉」與「價跌」趨勢，主要體現喺兩方面：１）人均旅遊支出３６６人幣，唔及
２０１９年嘅４０９人幣。２）三線以下城市繼續成為旅遊新增長點，其平台訂單熱度高於部分
一線和新一線城市。
　　睇到呢度，筆者覺得自己對「下沉市場」嘅見解其實都錯唔曬，甚至可以話同內地對「下沉
市場」嘅解釋殊途同歸。只係筆者小人之心，睇到「下沉」二字時，立刻諗起消費力降級，尤其
係一二線大城市消費力減退呢啲負面嘢。相反，內地睇到嘅係另一個充滿商機嘅龐大市場。因此
，「下沉市場」既可以代表一個潛在新市場，亦可以代表消費力降級嘅現象。由於呢個新市場嘅
消費群對價格敏感度高，容易出現如端午節長假呢種「量升價跌」嘅局面，呢種情況其實不限於
機票或旅遊業，甚至各行各業。可以想象，喺未來一段時間內，「下沉市場」將持續對內地經濟
發展帶來挑戰。請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。