《小傳日記》恒大(03333)自清盤以來就已經唔再係孖屐焦點,不過近期恒大汽車
(00708)傳出終於有人肯接手,都令孖屐精神為之一振。
恒大系三股入面,汽車都算係值錢嗰間,阿媽恒大清緊盤就不在話下,恒大物業
(06666)雖然提到包括同系公司在內並無單一客戶為公司帶來10%以上收入,但點計恒
大物業都係房地產行業,始終都係同樓市氣氛息息相關。而恒汽所屬汽車板塊雖然競爭激烈,但
有競爭即係有市場,都仲係吸引人想入市,起碼有得爭。而開發智能電動車需要投入好多,但起
碼恒汽都已經出過一架恒馳5,至少都有電動車基本技術,新玩家買返嚟都係一個易啲入市嘅選
擇。
所以恒汽一定唔怕賣唔出,一切都只係睇錢份上。恒汽行到今日都好唔容易,上年底到今年
初就曾經公布過撲到中東水喉,雖然睇返紐頓背景都具有唔少中資色彩,但名義上都係中東投資
者,都令孖屐興奮過一輪,但後來恒大終於要正式清盤,令到紐頓方面最後都係縮沙唔玩。但係
恒汽幾個月期間都係積極搵人接手,今次終於有成果。
當然孖屐最好奇都係今次邊個作為買家,唔知係咪上次紐頓科水太早公布,結果「小氣」而
令交易胎死腹中,今次就未肯講買家係邊個。但今次呢單交易出手更犀利,據公告提到,恒大同
關連方合共所持嘅58﹒5%恒汽,事成後「第三方買方」將會即時收購其中一半嘅29%股權
,另外29﹒5%會作為行使權股份喺之後再選擇交易,換句話講恒汽係有機會完全由恒大系剝
離。
恒汽公告提到,「第三方買方」除咗收購,仲會向公司提供信貸,令目前停廠嘅天津廠房可
以先行恢復生產。買股又借錢,可以估計目前嘅白武士都係相當疊水,而且一定係有意入手造車
。恒汽生產鏈同技術並唔係特別優秀,估計應該唔會係神州同行嚟接手,以上面提到嘅特性都應
該係未接觸過造車,或者係想入手神州電動車市場嘅外資會比較大機會。而國企嘅可能性都唔係
完全無,但國企已經周身唔得閑,會接手恒汽嘅機會都係比較低。
總而言之假設最後恒汽真係完全易手都係好事,因為「恒大系」呢個名都一直拖累公司無論
係發展定係銷售方面,賣清後改名換姓都一定會有幫助,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票