《小傳日記》「香港夜繽紛」玩咗幾個月，特首超哥早排話廟街夜市反應唔錯，決定延長繼
續搞，都算係夜繽紛系列最成功嘅一次。而早喺２月，就已經有人響應政府，計劃喺尖東原址復
活「大富豪夜總會」，呢兩日孖屐又再翻炒消息，呢次就傳出大富豪嘅集資計劃。
２月有傳媒報道，有娛樂場搞手行尊以過百萬月租租入尖東大富豪原址，再以過億銀豪裝，
希望重塑見證香港盛世嘅「大富豪夜總會」，以「新大富豪」名義再出發。噚日起傳出一份「大
富豪夜總匯投資方案」，提到「新大富豪」估值大約兩億銀，希望將一半股權分拆，即係籌集一
億銀嘅現金。
據２月媒體報道提到，「新大富豪」搞手籌集資金主要來源係北水，所以呢份投資方案都好
有趣地講明每投資１５００萬銀就可以為一人代辦申請香港身份證，直接以投資移民作為集資賣
點，相信都係搞手成功吸錢嘅要素。
另外方案入面都有提到，預計今年１０月中「新大富豪」就可以正式開業，預計２０２５年
盈利達到４０３０萬銀，到２０２６年更加會有成１﹒２４億銀，回本期１２至１５個月就得，
計劃２０２８年至２０２９年上市。先唔講上唔上市，但如今夜總會仲興唔興已經係一大疑問，
兩年係咪真係做到盈利過億呢？
據講「新大富豪」除咗會還原當年嘅大廳舞池，仲會為真嘅「大富豪」級客人另設貴賓廳，
兩邊客人會分開玩，即係好似賭場咁，各有各玩。如果貴賓廳真係搞得起，盈利過億都唔係無可
能，但整體運作都應該會似現時嘅Ｃｌｕｂ場為主，會係一門生意，但係咪一場大生意就要再睇
，始終定位、賣點同受歡迎程度仍然係未知之數。不過大富豪作為香港輝煌嘅象徵，如果可以活
用呢一點，喺好多方面都未嘗唔係優勢，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
《說說心理話》【怪獸家長必學】點樣幫仔女溫書不傷感情？培養上進心唔係靠鬧？子女一旦失控教你點應對！► 即睇
