《小傳日記》今年以來神州遊戲業置諸死地而後生,阿爺每月豪批過百隻版號嚟展示對遊戲
業嘅扶持力度加大,所以唔少遊戲股今年都有返生氣,尤其有AI概念嘅就更加當炒。龍頭QQ
(00700)最新成績表提到,遊戲業務喺上年第四季明顯到咗樽頸,高基數之下已經難再有
高增長表現,所以QQ方面都急於喺遊戲上搞啲新嘢。
今日就有傳QQ旗下王牌工作室天美同光子都正係招兵買馬,據聞係打算開發一款類似《幻
獸帕魯》嘅養成類遊戲。《幻獸帕魯》係今年1月先開始hit,係由一間日本遊戲工作室開發
嘅開放世界PC遊戲,感覺係類似薩爾達又或者係動物森友會嘅養成式野外求生遊戲,但特點就
係入面啲幻獸,資深機友一定會發現,所有幻獸都熟口熟面,根本就好似隔籬棚堆
Pokemon咁樣,每隻幻獸都總會發現到一隻同佢撞樣嘅Pokemon。
雖然撞口撞面,不過都無阻《幻獸帕魯》嘅爆紅之路,因為比起Pokemon只可以用精
靈球捉完再訓練出去對戰,《幻獸帕魯》入面更加似人類世界對待動物,捕獵幻獸之後可以訓練
佢幫自己做嘢,更加可以劏咗佢嚟食!呢一點都好震驚玩家,甚至惹嚟保護兒童組織抨擊,亦都
有素食組織要求《帕魯》推出「素食指南」。
據天美同光子嘅招聘啟事提到,今次請人係想開發一款「將開放世界、生存和製作元素與虛
擬寵物的培育結合在一起」同時係「擁有可愛寵物的奇幻冒險世界」嘅遊戲,暗示咗係對標《幻
獸帕魯》。
如果QQ真係想對撼《幻獸帕魯》,但係又要一樣「擁有可愛寵物」元素,唔知又會唔會將
可以劏嚟食嘅元素放落去呢?畢竟呢個都係《幻獸帕魯》嘅大熱元素,但係神州對於保護未成年
人政策咁全面,照計又好難批到可以殺寵物嘅遊戲,QQ要照辦煮碗兼跑出真係唔易,或者真係
要煮個「素食版」都唔定,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
【與拍賣官看藝術】常玉作品屢創天價,背後其實藏著跌宕起伏的人生► 即睇