《小傳日記》噚日ＱＱ（００７００）就喺深圳搞春茗，老闆馬化騰都現身同員工拜個早年
，開開心心玩返日。馬老闆仲罕有登台獻唱，大唱廣東話版《恭喜你》，雖然個咪攞到落心口位
，又有墊底聲疊著，不過喺台上揮曬手咁跳唱，都算係誠意十足。
身為老闆，揸咪都係聽佢訓話比較靠得著。會上馬老闆就提到，話過去四年都比較少露面，
係為咗專心嚴控管理同產品開發。不過可以回想返，過去幾年都係監管力度最大嘅時候，專心研
發之餘，更重要就係保持低調，槍打出頭鳥，太高調會好危險，呢一點馬化騰老闆一直得表現得
非常得宜。如今監管力度明顯大大減低，馬老闆就出來又唱又跳。
馬老闆又提到，微信發展至今已經有１２年，而呢棵「老樹」要點樣發新芽係一個好大嘅問
題。當中，視頻號就曾經被馬老闆視為係「全鵝廠嘅希望」，而過去呢一年都算不過不失，馬老
闆點名大讚視頻號為公司「帶來好多驚喜」。
於是，今年就為視頻號定下更大嘅目標，就係要以視頻號進軍電商。馬老闆話，ＱＱ唔可以
只跟喺人身後做一樣嘅嘢，而係要結合自身特質，做熟人社交嘅短視頻。佢提到，ＱＱ用戶群嘅
潛在消費能力好強，應該要好好運用，所以今年希望可以全力發展視頻號做直播電商，以目前視
頻號擅長嘅廣告業務，同電商一齊相輔相成。
雖然話唔飲人口水尾，但係有拼多多嘅發達例子，有實力嘅又點會唔心動。人人都做電商，
不過ＱＱ如果可以發揮到用視頻號做電商嘅獨特性，咁就有可能係致勝關鍵。馬老闆提到嘅「相
輔相成」都係一個要點，如果視頻號入面間唔中都可以碌到直播帶貨剪出來嘅廣告片，配合剪接
技巧，先唔講件貨受唔受歡迎，但係覆蓋率一定會有保證。一出世就贏喺起跑線上，視頻號直播
電商聽落都係比較值得期待，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【與拍賣官看藝術】收藏界遺珠？超現實主義藝術家林飛龍注入拉美元素！► 即睇
