《小傳日記》魚缸一日慘過一日，今日成交終於過千億，係２０２４年以來第一次，不過可
惜就係跌市，最多跌過６００幾點，噚日穿１６０００，差啲今日就可以穿埋１５０００。
跌市之下乜都跌，原本中段都仲有隻海爾智家（０６６９０）做全場唯一升嘅藍籌，結果尾
市都要跌，最後今日全線８２隻藍籌無一倖免統統跌，海爾智家跌１％多啲已經係最好表現，榜
尾就有能醫不自醫嘅阿里健康（００２４１）要跌逾８％。
個市咁殘，就連大行都要縮沙。早兩日滙證發表研究報告，唱淡ＱＱ（００７００）前景。
滙證就大彈ＱＱ最煞食嘅遊戲業務有青黃不接現象，傳統大遊戲基數龐大已經好難有增長，新興
ｐａｒｔｙ ｇａｍｅ又未咁快可以成為增長動力，將今年嘅內地遊戲增長預測由５％降到去
３％。唔止咁，ＱＱ另一個增長動力視頻號同樣被唱淡；滙證就話神州經濟唔掂，商家投放喺視
頻號嘅廣告都會相對減少，所以要借經濟環境呢道東風嘅廣告業自然唔馨香，所以就將今年ＱＱ
嘅線上廣告增長預測降至１１％。種種因素夾埋，於是就將目標價由４１５銀降到去３８０銀。
ＱＱ最高曾經都係世界市值頭十名，不過自從監管風暴以來，ＱＱ都好難再橫向發展，連原
本手持嘅京東（０９６１８）同美團（０３６９０）股份都要派街坊，就係唔可以有太多額外嘅
收入，唯有專注喺目前嘅四大業務上面。但大家都知科技股係講創新，騰訊成立咁多年，累積基
數咁龐大，已經好難再有大增長，加上發展受限，兼夾經濟唔好，令到ＱＱ連賣廣告都唔靈，打
破曬孖屐嘅希望。
美團同巴巴（０９９８８）都已經被睇淡，美團仲已經被調低恒指權重，ＱＱ已經係魚缸最
後希望，如果都表現唔得，魚缸真係萬四不遠矣，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
夏日中暑高風險！即睇中暑迷思＋預防措施！► 立即了解
