《小傳日記》神州有句叫「窮養兒、富養女」，即係生仔要唔好畀佢過得太富足，等佢學識
唔辛苦係唔得世間財；生女就反而要矜貴咁養，第時大個先無咁易受到世間嘅引誘。近期上面就
熱傳，繼魚缸上市嘅衛龍（０９９８５）之後，辣條界第二把交椅麻辣王子嘅太子爺張子龍，就
被老竇張玉東扼咗廿年，到中學畢業先知原來自己係太子爺！
有博客就訪問到張子龍，過去廿年來佢一直都懵然不知屋企係做咩生意，因為老竇一直同佢
講屋企欠落一屎忽債，佢到畢業之後都只係想搵份幾千銀月薪嘅工來幫手還錢，點知搵極都搵唔
到，老竇先叫佢來公司返工，原本佢仲嫌屋企盤生意窮到燶唔願返，點知一返到總部先知公司一
啲都唔窮，仲係辣條界龍頭。之後呢個廿年嘅「善意的謊言」先開估，全家由平江縣城嘅舊屋搬
入剩係裝修都過千萬嘅豪宅，率之由窮小子變成真正「麻辣王子」。
變身後嘅張子龍對於老竇天大嘅謊言並無太上心，雖然意外，但係都理解老竇嘅用意，仲好
感激老竇對佢嘅栽培，令佢更加珍惜機會。目前「麻辣王子」擔任公司嘅抖音部負責人，不過身
為太子爺待遇依然唔夠６０００銀人仔一個月，返工都係要自己騎電單車，目前最大目標就係幫
到公司壯大甚至上市。
事實上麻辣王子咁大盤生意，對個仔可以冚得咁密都好難得。神州辣條界「南玉峰、北衛龍
」，即係分別喺河南成立嘅衛龍，以及喺湖南成立嘅玉峰，即係麻辣王子母公司。最初張玉東係
做茶業生意，後來２０００年代由衛龍帶起咗即食辣條風潮，張玉東先跟住入市。
當年神州地溝油泛濫，普遍人民都覺得即食辣條呢類零食就係唔健康嘅代表，張玉東認為辣
條既係湖南嘅名物，就唔應該被害污名化。於是張玉東就為麻辣王子改用一個新嘅小清新包裝，
就已經令辣條昇華咗一個層次，搵多咗錢之後，更揼本３０００萬人仔起咗全國第一個十萬級
ＧＭＰ認證生產車間來生產辣條，為辣條由污糟邋遢變成健康衛生嘅形象，到上年前１１個月，
銷售額已經突破１０億人仔，按年增四成半。
張玉東做生意同教仔都有一套，假設當年佢做辣條生意就將佢叫做「麻辣王子」，實際上就
係為咗張子龍如今青蛙變王子嘅戲劇性畫面鋪路，令個仔成為真嘅「麻辣王子」做公司生招牌，
又刷一波宣傳，都算係用心良苦，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【與拍賣官看藝術】收藏界遺珠？超現實主義藝術家林飛龍注入拉美元素！► 即睇
