《小傳日記》新年新豬肉，香港喺啱啱個除夕倒數舉行咗久違嘅煙花匯演，雖然無公布到預
算幾多，不過好多人都覺得今年煙花特別多色特別靚，而且官方都有講到係歷來最大規模，可以
稱得上係咁耐以來「最繽紛」嘅夜繽紛活動。
港府出動到「最繽紛」煙花留人，但係天上嘅繽紛偏偏照唔到去電影業。近期香港影業協會
及戲院商會就公布數據，聖誕檔期１２月２４至２６號三日入面，全港電影票房只有接近
１９６０萬銀，比起上年同期少咗１３２０萬銀，大跌咗四成有多，其中最高票房係西片《水行
俠與失落王國》，都只係得６５９萬銀，贏盡口碑嘅港產片《年少日記》就只有１３０萬銀。
其實本地票房今年大跌唔多唔少都係高基數效應，上年同期仲未正式通關，無得出關嘅市民
無乜娛樂就去睇吓戲，加埋真係好戲關係，先造就到２０２２年尾至２０２３年頭出現咗有史以
來最高票房嘅港產片《毒舌大狀》，合共１﹒１５億銀票房，至今仲係唯一一套億萬票房嘅港產
片。
至今通關接近一周年，呢一年港人恢復外遊，就算唔出國，返深圳玩都變成新常態，咁多嘢
可以做，又使乜一定要留港睇戲？就算要睇戲，返深圳最貴幾十蚊一張飛都已經可以睇到３Ｄ同
ＩＭＡＸ，比起香港要成百幾二百銀先睇到，深圳睇戲實在平太多，相信就更加係香港電影票房
低迷嘅主因。
對比起愁雲慘霧嘅本地票房，神州元旦檔期票房就持續熱爆。據貓眼數據，單係１２月３０
至１月１嘅神州總票房就有成１３﹒１１億人仔，創下元旦檔期歷史新高。而國家電影局亦都公
布，２０２３年全年神州票房達到５４９﹒１５億人仔，觀影人次達到１２﹒９９億人次，創四
年以來新高。所以今日隻貓眼（０１８９６）都大升６％有多，足以見到神州電影業嘅熱門情況
。而香港戲院受眾本來就比神州戲院為少，仲要原本嘅觀眾都轉返深圳睇戲，似乎本地戲院面對
嘅真係不可抗力因素，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】9歲泳手一度被拒參賽，議員指泳總執委會長兼任上訴委會長欠公正► 立即投票
