《小傳日記》呢個下半年全部科技股仆直，唯有係小米（０１８１０）獨領風騷，一架小米
造車由消息變成真實，令到股價都水漲船高。
事前就話不斷被人洩露機密，如今準備開訂就輪到自己係咁吹風造勢，反正英雄就係造時勢
架啦。小米今日就舉行汽車「技術」發布會，事前雷軍講明「只發技術，不發產品」，不過發布
會前就已經急不及待發布ＳＵ７海灣藍嘅先行「玉照」，車身隻藍色係土耳其藍，睇落都好搶眼
。尤其係車頭燈用咗雙層ＬＥＤ燈，形成類似「米」字形狀，提高辨識度，不過係咪真係咁似就
真係兩睇。
小米今日下晝正式舉行造勢大會，期間雷總就提到，小米造車嘅目標係要媲美波子同
Ｔｅｓｌａ，希望十五至二十年之後，可以成為全球前五名的車廠。雷總又講到，ＳＵ７目前已
經小批量產，但仲要做多幾個月測試先可以正式上市，確保萬無一失。
小米今次出呢架車對於消息管控方面都非常盡力，雖然事前話「被」洩露消息，不過都帶起
咗好多次炒風。而今次造勢大會之前，小米身為科技巨頭，但又係造車新人，雷軍就先禮後兵，
喺微博講明「我們深知汽車工業之複雜，我們深知開拓之不易，向中國新能源汽車產業先驅致敬
！誠摯向比亞迪（０１２１１）、蔚來（９８６６）、小鵬（０９８６８）、理想
（０２０１５）、華為和寧德時代等公司致敬」，該提嘅都有提到。對於新人嘅敬茶，ＢＹＤ、
小鵬等等都出ｐｏｓｔ回應，「歡迎」小米加入造車大家庭。
如今車業競爭咁激烈，周不時都出現兩間車企高管嘅口水戰，今次雷總一來就向對手點名致
敬，唔知之後係咪真係可以和平競爭，但可以睇到小米無論係技術測試，定係輿論管理方面都係
非常小心，確保有咩事都至少唔係因為流言蜚語，足以證明小米今次嘅高度重視，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
夏日中暑高風險！即睇中暑迷思＋預防措施！► 立即了解
