《小傳日記》東方甄選（０１７９７）馬騮戲告終，勞資雙方最後以「勞方」董宇輝獲提升
待遇勝出呢場「二選一」之戰。場內精彩萬分，場外花生友一地花生殼，不過最大粒都莫過於羅
永浩嗰粒。
「丈母娘」脫粉東方甄選攻勢期間，羅永浩不斷喺場外發炮助攻，痛斥東方甄選同俞敏洪對
董宇輝嘅唔人道，全程助力「丈母娘」幫董宇輝爭取福利。期間羅永浩就提過，東方甄選可能係
中國誕生以來，佢見過「最不公平、最荒唐、最欺負壓榨年輕人的現象級公司」，就算孫東旭被
下台之後，都照樣話「觀感很差，又是個昏招」。當董宇輝收穫「高級合夥人」稱號之後，就提
到係「支持董宇輝的人的階段性勝利」，而呢一個讓步對於東方甄選呢隻「鐵公雞」都唔容易，
但都坦言東方甄選嘅ｏｆｆｅｒ已經算得上天價。
董宇輝待遇唔好，羅永浩算係最有資格批評，皆因２００６年羅永浩就係不滿新東方
（０９９０１）待遇而離場。羅永浩當年仲係新東方嘅講師之一，教學風格風趣幽默，更加有學
生為佢成立「老羅語錄」，令佢自己同新東方一時爆紅。不過人紅就容易囂，羅永浩試過同學生
喺課堂上講起新東方嘅是非，一時令方丈差啲想炒咗佢，其後新東方覺得佢每年幫公司賺過千萬
廣告費，於是就放過佢。不過羅永浩就覺得既然自己幫到手賺過千萬，但係待遇只係同其他老師
一樣，所以就索性走人。
時隔多年，羅永浩期間多番創業都係衰收尾，結果都係要打工，最終就喺交個朋友
（０１４５０）做直播主，同東方甄選打對台。痛批東方甄選，羅永浩一來係感同身受，二來都
係借住花生料炒作自己。據報喺食花生嘅呢幾日，交個朋友抖音多咗３６萬粉絲，創咗三個月以
來最大增幅。如果唔係有當年羅永浩嘅意興闌珊，今日東方甄選又有無咁珍惜董宇輝呢？請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【慎防受騙】偽冒《經濟通》投資群組頻現，切勿誤信騙徒，如有疑問，請循官方渠道查詢► 了解詳情
