《小傳日記》成也董宇輝,敗也董宇輝;東方甄選(01797)又再因為董宇輝而出現「
關公災難」。董宇輝係東方甄選第一個做雙語直播帶貨嘅主播,係東方甄選上位以來嘅「主播一
哥」,一個人就已經主宰住東方甄選嘅半壁江山。
人紅多粉絲,董宇輝都大把,仲稱之為「丈母娘」,同香港某啲明星一樣,粉絲人多勢眾,
自然形成一股勢力。東方甄選身為一間上市公司,旗下咁多主播,當然想百花齊放,如果單天保
至尊就好容易出事。所以神州網上經常有傳東方甄選有意「去董宇輝化」,減低董宇輝嘅影響力
,以免妹仔大過主人婆。
噚日東方甄選急插一成二,就係「丈母娘們」出手嘅結果。事緣讀英文出身嘅董宇輝,一向
直播嗰陣都「文采非凡」,曾經出現過嘅金句就例如「我沒有帶你去看過長白山皚皚的白雪,我
沒有帶你感受過十月田間吹過的微風,我沒有帶你去看過沉甸甸的彎下腰猶如智者一般的穀穗,
我沒有帶你去見證過這一切,但是親愛的,我可以讓你品嚐這樣的米」,雖然香港人會覺得過份
矯情,不過偏偏有人受,仲收穫一大群「丈母娘」。
所以呢啲「文采金包」正正就係董宇輝圈粉嘅魅力,不過早兩日嘅「吉林之行」直播,就引
起咗網民對董宇輝金句係出自誰人手筆嘅爭論。喺宣傳片段下面東方甄選小編就回應,話「每一
次小作文製作都是主播在鏡頭前,背後是文案創作團隊、拍攝團隊、剪輯團隊的小夥伴們,大家
協作,才有了一篇專場小作文」,令到唔少以為全部金包都係董宇輝包辦嘅「丈母娘」都為之震
驚。
隨後小編忍唔住長文反駁,更加激起「丈母娘們」把火,佢哋認為東方甄選係刻意矮化董宇
輝對公司嘅貢獻,又喺度「去董宇輝化」,所以又發起對東方甄選抗議,由10號事發到13號
,東方甄選抖音帳戶流失超過10萬fans,而對手高途佳品11號晚嘅直播收看人首度破萬
,係開播以來嘅新高,有唔少人都直接係因為小作文事件而由東方甄選跳槽過來。
雖然「丈母娘」好戥董宇輝唔抵,但事實上董宇輝並無同東方甄選有咁大矛盾,事後仲幫手
安撫「丈母娘」,不過unfollow咗嘅fans就好難返來,跌咗嘅股價今日都未修復到
。東方甄選已經唔係第一次因為主播而出現「關公災難」,有意見就覺得係東方甄選方面管理不
善,所以今次都係話畀東方甄選知嘅一次警號,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票